मुख्यमंत्री श्री विष्णुदेव साय ह नवलीन ल बधाई दीन अऊ कहिन के छत्तीसगढ़ के उभरत प्रतिभा ल मिलही हरसंभव सहयोग

राज्य सरकार प्रदेश के हर खिलाड़ी ल अवसर, संसाधन अऊ मंच देहे बर प्रतिबद्ध हे: मुख्यमंत्री
महासमुंद के नवलीन कौर ह तीरंदाजी म राष्ट्रीय खेल म जगा बनाईस, राज्य स्तरीय प्रतियोगिता म स्वर्ण पदक जीतीस
महासमुंद, मुख्यमंत्री श्री विष्णुदेव साय ह कहिन के छत्तीसगढ़ के हर खिलाड़ी ल उंखर मेहनत, लगन अउ क्षमता के अनुरूप अवसर, संसाधन अउ मंच उपलब्ध कराए जाही। उमन महासमुंद जिला के नवोदित तीरंदाज नवलीन कौर ल अवइया राष्ट्रीय खेल म तीरंदाजी म स्थान बनाए बर बधाई अउ शुभकामना दीन। मुख्यमंत्री ह कहिन कि नवलीन जइसे खिलाड़ी छत्तीसगढ़ के भविष्य के नींव हे अऊ सरकार ओ ल खेल के हर स्तर म निखारे बर हरसंभव सहायता प्रदान करही। जन्म ले ही स्वास्थ्य चुनौति ले जूझत नवलिन ह एला अपन कमजोरी न ही, भलुक बल म बदलिस अऊ खेल ल अपन जीवन के रद्दा बनाइस।
वो ह फरवरी 2025 म राज्य स्तरीय प्रतियोगिता म स्वर्ण पदक जीतके ए साबित करिस के इच्छाशक्ति अऊ मेहनत के आघू कोनो बाधा बड़े नइ हो सकय। महासमुंद जिला के बागबहरा निवासी नवलीन कौर श्री अरविंद अउ श्रीमती रंजीत कौर छाबड़ा के बेटी आय। ओहा गर्भावस्था के सातवां महिना म पैदा होईस, जेखर ले शुरुआती बरस म कईठन स्वास्थ्य समस्या रहिस। परोसी, रिश्तेदार अउ परिचित हमेशा ओखर स्वास्थ्य के बारे म पूछताछ करत रहिन, जेखर ले ओहा कभु – कभु उदास हो जात रहिस। लेकिन नवलीन हर जिज्ञासा ल चुनौती के रूप म स्वीकार करिस अउ खुद ल एक नवा दिशा म ढाल दिस। 2018 म, नवलिन ह बागबहरा ले लगभग पांच किलोमीटर के दूरी म बिहाझर बालाश्रम म तीरंदाजी के प्रशिक्षण शुरू करिस। ओहा महासमुंद जिला के पहिली महिला तीरंदाज बनीस। स्कूली शिक्षा के दौरान, ओहा दु पइत राज्य स्तरीय प्रतियोगिता म पदक प्राप्त करिस अउ एक पइत राष्ट्रीय स्तर के स्कूली तीरंदाजी प्रतियोगिता म चौथा स्थान प्राप्त करिस।
2023 म ओहा गुजरात म आयोजित एफजीएफआई राष्ट्रीय तीरंदाजी प्रतियोगिता म छत्तीसगढ़ के प्रतिनिधित्व करिस अउ राज्य स्तरीय वरिष्ठ तीरंदाजी प्रतियोगिता म दूसर स्थान प्राप्त करिस। नवलिन के लक्ष्य अंतरराष्ट्रीय स्तर म भारत के प्रतिनिधित्व करत पदक जीतना हे।
वो ह बताईस के अंतरराष्ट्रीय स्पर्धा म कंपाउंड बो से खेले जाथे, जेखर बर ओकर परिजन मन ह वो ल एक नवा आधुनिक कंपाउंड धनुष प्रदान करे हे। वो ह सिटी ओपन तीरंदाजी प्रतियोगिता म कंपाउंड राउंड बालिका वर्ग म प्रथम स्थान प्राप्त करके एकर शानदार शुरुआत करे हे।
मुख्यमंत्री श्री विष्णुदेव साय ह कहिन के क्रिकेट के लोकप्रियता के ए दौर म कहूँ कोनो खिलाड़ी तीरंदाजी जइसे विशिष्ट खेल म कड़क मेहनत करके प्रदेश अऊ देश बर पदक लाए के दिशा म काम करत हे त ये न केवल सराहनीय हे बल्कि प्रेरणादायक घलो हे। नवलिन जइसे प्रतिभा छत्तीसगढ़ के युवा मन ल ए संदेश देथे कि प्रतिबद्धता, अभ्यास अऊ आत्मविश्वास के बल म कोनो भी लक्ष्य हासिल करे जा सकत हे।