डोंगरगढ़, 17 अक्टूबर 2020। आज ले मां दुर्गा के आराधना के पर्व नवरात्रि शुरू होवत हे। 17 अक्टूबर ले घटस्थापना के संग देवी के 9 दिन के नवरात्रि यानी दुर्गा पूजा के शुभारंभ हो जाही। ए बार देवी के भक्त मन के उत्साह कोरोना संक्रमण ह आधा कर देहे हे। चैत्र के बाद क्वांर नवरात्र म घलो डोंगरगढ़ के मां बम्लेश्वरी देवी मंदिर म श्रद्धालु मन के प्रवेश वर्जित कर देहे हे, एखर ले मां के मंदिर म जलने वाला ज्योति कलश मन के संख्या घलो आधा होगे हे।
पिछला बार क्वांर नवरात्र म मां के मंदिर म 7 हजार ले जादा ज्योति कलश प्रज्ज्वलित होए रिहिस। उहें डोंगरगढ़ म हर साल लगने वाला नवरात्रि के मेला ल घलो स्थगित कर देहे गए हे।
कोरोना संक्रमण के चलत नवरात्र के पर्व म बंदिश लग गेहे। कोरोना के पाबंदी के बाद घलो चैत्र नवरात्रि म ऊपर मंदिर म 5 हजार 111 अऊ नीचे मंदिर म 713 ज्योति कलश प्रज्वलित होए रिहिस। मां बम्लेश्वरी मंदिर ट्रस्ट के अनुसार नीचे मंदिर म अभी तक 500, अऊ ऊपर मंदिर म लगभग 3 हजार ज्योति कलश के पंजीयन होए हे। मां बम्लेश्वरी के दरबार म हर साल विदेश मन ले घलो श्रद्धालु ज्योति कलश प्रज्वलित कराथे।
