- नक्सल प्रभावित जिला मन बर विशेष सहायता राशि फेर शुरू करे के करिन आग्रह
- श्री बघेल ह राज्य ल मिलईया जीएसटी क्षतिपूर्ति जारी रखे के करिन अनुरोध
- केंद्रीय गृहमंत्री ह नक्सल मोर्चा म छत्तीसगढ़ ल हरसंभव मदद करे के दीन आश्वासन
नई दिल्ली, छत्तीसगढ़ के मुख्यमंत्री श्री भूपेश बघेल ह बुधवार के नई दिल्ली म केंद्रीय गृहमंत्री श्री अमित शाह ले मुलाकात करिन। ये बेरा म मुख्य रूप ले जीएसटी प्रणाली ले राज्य के संसाधन मन म होए असर अऊ नक्सल समस्या ले जुड़े नीतिगत विषय मन उपर गृहमंत्री ले विस्तार ले चर्चा होइस। एखर संगेच नक्सल प्रभावित क्षेत्र मन म संचार सुविधा बढ़ाए, बस्तर म सीआरपीएफ के दू अऊ बटालियन के तैनाती, बस्तरिया बटालियन के गठन संग कई ठन मुद्दा मन उपर चर्चा होइस। जेन म केंद्रीय गृह मंत्री ह जल्दी कार्रवाई के आश्वासन देहे हें।
बैठक म छत्तीसगढ़ के मुख्यमंत्री श्री बघेल ह छत्तीसगढ़ के 7 नक्सल प्रभावित जिला मन ल मिलईया विशेष सहायता राशि ल फेर शुरू करे के आग्रह करिन। ये बेरा म मुख्यमंत्री ह जीएसटी क्षतिपूर्ति के मुद्दा घलोक उठाइन। श्री बघेल ह कहिन कि राज्य मन ल मिलईया जीएसटी क्षतिपूर्ति बंद करे म राज्य के आर्थिक स्थिति म प्रभाव परही। नक्सल प्रभावित राज्य मन म विकास काम बर राशि नइ मिलही त एकर काफी असर परही। ये बात म घलोक सहानुभूति पूर्वक विचार के आग्रह करिन।
ये बेरा म मुख्यमंत्री श्री बघेल ह कहिन कि बस्तर अंचल म लौह अयस्क प्रचुरता ले उपलब्ध हे। कहूं बस्तर म स्थापित होवइया स्टील प्लांट्स ल 30 प्रतिशत डिस्काउन्ट म लौह अयस्क उपलब्ध कराए जाय, त उहां सैकड़ों करोड़ के निवेश अऊ हजारों के संख्या म प्रत्यक्ष अउ अप्रत्यक्ष रोजगार के अवसर निर्मित होही। उमन कहिन कि कठिन भौगोलिक क्षेत्र के सेती बड़े हिस्सा म अभी तक ग्रिड के बिजली नइ पहुंच पाए हे। सौर उर्जा संयंत्र के जादा ले जादा स्थापना ले ही आमजन के उर्जा जरूरत के पूर्ति अऊ ओखर आर्थिक विकास संभव हे।
मुख्यमंत्री ह वनांचल मन म लघु वनोपज, वन औषधि अऊ बहुत प्रकार के उद्यानिकी फसल मन के प्रसंस्करण अउ विक्रय के व्यवस्था बर कोल्ड चेन निर्मित करे अनुदान देहे के आग्रह करिन। बैठक म छत्तीसगढ़ के मुख्यमंत्री श्री बघेल ह नक्सल प्रभावित ज़िला मन के विकास ले जुड़े मुद्दा रखिन। ये दौरान उमन आजीविका विकास, नक्सल क्षेत्र मन म बैंक, सड़क, आधारभूत संरचना के विकास संबंधी मुद्दा म घलोक अपन बात रखिन।
ये बैठक म गृह विभाग के अपर मुख्य सचिव श्री सुब्रत साहू अऊ पुलिस महानिदेशक श्री अशोक जुनेजा घलोक सामिल रहिन। मुलाकात के समय केंद्रीय गृहमंत्री श्री अमित शाह ह सुझाव अऊ आग्रह उपर गंभीरता पूर्वक विचार करके मांग मन ल पूरा करे के आश्वासन देहे हें।