नक्सल प्रभावित गांव मन म महिला किसान मन के मुस्कान बनिस सौर सुजला योजना

राजनांदगांव, जिला राजनांदगांव के नक्सल प्रभावित विकासखंड छुईखदान के सुदूर वनांचल स्थित ग्राम बकरकट्टा अऊ ग्राम याम्ही म सौर सुजला योजना ग्रामीण क्षेत्र के किसान मन बर परिणाममूलक साबित होवत हे। योजना के तहत न सिरिफ पुरूष कृषक भलुक महिला कृषक मन ल घलोक भरपूर फायदा मिलत हे।
श्रीमती फुलबासन बाई सोलर पंप के स्थापना के पहिली ए क्षेत्र मन म निवासरत कृषक मन के स्थिति ल बतात कहिथे कि पहिली उंखरेच जइसे सबो किसान बरसा के भरोसा होए के सेती सालभर म केवल एके फसल लेत रहिन। कभू-कभू अल्पवृष्टि होए म किसान मन ल एके फसल लेहे बर घलोक अड़बड़ कठिनाई के सामना करना परत रहिस अऊ कभू-कभू पानी कम गिरे ले पूरा फसल घलोक खराब हो जात रहिस। फेर अब सोलर पंप लग जाय ले सिंचाई के सुविधा बाढ़े हे अऊ ओ मन साल म दू फसल ले पात हें। उमन बताइन कि ओ मन सोलर पंप ले 5 एकड़ खेत म धान के फसल लेवत हें।
श्रीमती निराषा बाई के बताती सौर सुजला योजना के तहत सोलर पंप के स्थापना के बाद अब ओ मन एक साल म कम से कम तीन फसल लेहे के क्षमता रखथें। 2 ले 3 फसल लेहे ले वोखर आय म वृद्धि हो गए हे अऊ आर्थिंक मजबूत बने हे। सौर सुजला योजना के लाभ लेहे ले बिजली उपर निर्भरता खतम हो जाथे। निराषा बाई सोलर पंप ले 2 एकड़ म धनिया फसल अऊ 2.5 एकड़ म धान के फसल के उत्पादन करत हे। सोलर पंप स्थापना ले दुनों हितग्राही संतुष्ट हे।