केंद्रीय गृह अउ सहकारिता मंत्री श्री अमित शाह ह छत्तीसगढ़ के नवा रायपुर म सुरक्षा बल के जवान मन के संग करिन गोठ-बात

प्रधानमंत्री श्री नरेन्द्र मोदी जी के अगुवई म जब मार्च, 2026 म देश नक्सलवाद ले मुक्‍त होही, वो घड़ी आजादी के बाद के सबले महत्वपूर्ण घड़ी मन म ले एक होही
नक्सल प्रभावित क्षेत्र के लइका जब हाथ म बंदूक के जगा पेंसिल पकड़थे, त न सिरिफ एक क्षेत्र बल्कि पूरा देश के भविष्य संवरथे
नक्सली हिंसा गरीब अऊ आदिवासी मन बर बहुत बड़ विभीषिका रहे हे
जब नक्सलवाद ले मुक्ति के विजय गाथा लिखे जाही, वोमें सुरक्षा बल मन के परिश्रम, त्याग अउ बलिदान ल स्वर्णिम अक्षर ले लिखे जाही
जेन क्षेत्र ले नक्सलवाद ख़तम होवत हे, उहाँ हमर सरकार अनाज, स्वास्थ्य सुविधा, शिक्षा, घर, अऊ पीए के शुद्ध पानी पहुंचाके लाल आतंक के समूल नाश करत हे
रायपुर, केंद्रीय गृह अउ सहकारिता मंत्री श्री अमित शाह ह काली छत्तीसगढ़ के नवा रायपुर म सुरक्षा बल के जवान मन के संग गोठबात करिन। बैठक म छत्तीसगढ़ के मुख्य मंत्री श्री विष्णु देव साय, उप मुख्यमंत्री श्री विजय शर्मा, केन्द्रीय गृह सचिव, आसूचना ब्यूरो के निदेशक, बीएसएफ के महानिदेशक संग आन वरिष्ठ अधिकारी उपस्थित रहिन।
केंद्रीय गृह अउ सहकारिता मंत्री ह जवान मन ल संबोधित करत कहिन के मैं आज इहां उपस्थित केंद्रीय सुरक्षा बल मन, कोबरा टीम, छत्तीसगढ़ पुलिस बल अऊ डीआरजी के साहस, शौर्य, बलिदान अऊ समर्पण ल नमन करत हंव। उमन कहिन के मोला पूरा विश्वास हे के सुरक्षा बल के जवान अपन शौर्य अऊ परिश्रम ले ही नक्सली मन के संग मुठभेड़ ल सफल बनावत हें।
केंद्रीय गृह मंत्री ह कहिन के सुरक्षा बल मन ह जेन शौर्य, धैर्य अऊ समर्पण के संग  माओवादी मन के बनाये अड्डा मन ल तहस-नहस करत हें, ओ ह विश्व के सबो सुरक्षा बल मन ल आश्चर्यचकित कर देहे हे। उमन कहिन के मोला मालूम हे के सेना के जवान जेन तय करथें, वो हासिल करथें। सुरक्षा बल मन के इही भरोसा ले मैं देश म 31 मार्च 2026 तक नक्सलवाद के खात्मा के ऐलान करे हंव।
केन्द्रीय गृह अउ सहकारिता मंत्री श्री अमित शाह ह छत्तीसगढ़ के नवा रायपुर म ‘लियोर ओयना’ – नक्सली मन कोति ले आदिवासी मन के भीषण संहार अऊ बस्तर ल बचाय के  प्रयास उपर लिखित पुस्तक के लोकार्पण घलोक करिन। नक्सली मन ह जेन मासूम, निहत्था मनखे मन ल अपन हिंसा के शिकार बनाय हे, उंखर पीरा ल समझे म ये पुस्तक सहायक होवइया हे। ये पुस्तक ह्यूमन राईट के नाम म नक्सली मन ले संवेदना देखइया मनखे मन के आँखी के आगू ले पर्दा हटाए अऊ ओ मन ल एक्सपोज करे म घलोक उपयोगी सिद्ध होही।