बस्तर ओलंपिक अऊ बस्तर पंडुम के आयोजन ले मनखे मन म बाढि़स सरकार उपर भरोसा
रायपुर, मुख्यमंत्री श्री विष्णुदेव साय बिरसपत के सुदर्शन चैनल कोति ले आयोजित कार्यक्रम म साक्षात्कार के समय कहिन के छत्तीसगढ़ म नक्सलवाद ल खतम करके मनखे मन के विश्वास जीतना अऊ विकास के दिशा म आगू बढ़ना हमर सरकार के प्रमुख उद्देश्य मन म ले एक हे। उमन कहिन के छत्तीसगढ़ सरकार ए उद्देश्य ल धरातल म लाय खातिर नियद नेल्लानार योजना के माध्यम ले मनखे मन के जीवन स्तर ल उन्नत बनाए के काम करत हे। अब तक नक्सल प्रभावित क्षेत्र मन के 327 गांव आबाद हो गे हे। आत्मसमर्पण करइया नक्सली मन ल रोजगार ले जोड़े के काम करे जात हे। नक्सली मन के गतिविधि मन ले निर्दोष मनखे मन के मौत होवत रहिस, आम मनखे मन के रक्षा करना सरकार के दायित्व हे। हमर सरकार ह नक्सलवाद ल 31 मार्च 2026 तक खतम करे के लक्ष्य रखे हे। सरकार बने के बाद ज्वाइंट टास्क फोर्स के गठन करके नक्सलवाद ल खतम करे के उदीम जारी हे।
विकसित भारत के संकल्प के संग विकसित छत्तीसगढ़ के संकल्प होही पूरा
मुख्यमंत्री ह कहिन के देश के प्रधानमंत्री के संकल्प 2047 तक भारत ल विकसित भारत के रुप म खड़ा करना हे। ये संकल्प सबके सहभाग ले पूरा होही अऊ ए संकल्प ल पूरा करे खातिर केन्द्र अऊ राज्य सरकार सरलग काम करत हे। एक नवा भारत के निर्माण करत हे। उमन कहिन के विकसित भारत के संकल्प के संग विकसित अंजोर विजन (छत्तीगढ़ विजन) डॉक्यूमेंट 2047 तियार करके राज्य के विकास खातिर हर संभव प्रयास करे जात हे। सबो ल विकसित छत्तीसगढ बनाए म सहयोग करना चाही।
बस्तर के आदिवासी मन ल देश-दुनिया ले जोड़के देखाय जात हे विकास के रद्दा
मुख्यमंत्री ह कहिन के अइसे काम करे जात हे, ताकि शासन के कई ठन जनकल्याणकारी योजना मन के लाभ जनता उठा सकंय। वनांचल म तेंदूपत्ता बिसाए के काम सहकारी समिति मन के माध्यम ले करे जात हे। एखर संगेच बस्तर के मनखे मन म नक्सलवादी विचारधारा के उलट विचारधारा ल जागरूक करे अऊ विकास के धारा म उमन ल जोड़े के उद्देश्य ले बस्तर ओलंपिक अउ बस्तर पंडुम के आयोजन करे जात हे। बस्तर ओलंपिक म 1 लाख 65 हजार मनखे सामिल होके ये साबित करे हें के ओ मन विकास के मार्ग म आगू बढना चाहत हें।
जापान अऊ कोरिया के लगभग 150 उद्यमी ले होइस संपर्क
अवइया 6-7 महिना म छत्तीसगढ़ म 7 लाख करोड़ के निवेश के मिलीस प्रस्ताव
मुख्यमंत्री ह अपन विदेश यात्रा ल लेके बताइन के हमर यात्रा सफल रहिस जापान अऊ कोरिया म देश के पवेलियन लगिस, हमला 24 ले 31 अगस्त तक के समय मिले रहिस जिहां सबो क्षेत्र के कला ल प्रदर्शित करे गीस। उमन बताइन के प्रदेश म उद्योग स्थापित करे खातिर विदेशी उद्योगपती मन ल आमंत्रित करे गए हे। नवा उद्योग नीति के संबंध म घलोक जानकारी देहे गए हे। नवा उद्योग नीति म रोजगार ल सामिल करे गए हे।
जापान अऊ कोरिया के लगभग 150 उद्यमी ले होइस संपर्क
उमन कहिन के छत्तीसगढ म उद्योग के अपार संभावना हे। इहां नैसर्गिक संपदा हे, आयुर्वेदिक खातिर हर्बल प्लांट के हिसाब ले देखे जाय त इहां 44 प्रतिशत वन हे। उमन दूरस्थ वनांचल मन म घलोक स्वास्थ्य के क्षेत्र म अड़बड़ विकास होय हे। प्रदेश म अभी हाल म 15 मेडिकल कॉलेज, आईआईटी, एन आई टी, आई आई एम, नेशनल ला यूनिवर्सिटी संग उच्च शिक्षण संस्थान के स्थापना करे गए हे।
भारत रत्न पहिली प्रधानमंत्री श्री अटल बिहारी बाजपेयी जी के योगदान ले इहां एम्स के घलोक स्थापना होए हे। अब स्वास्थ्य के लिहाज ले इहां के मनखे मन ल प्रदेश ले बाहिर जाना नइ परय। उहें इहां के लइका मन ल उच्च शिक्षा खातिर बाहिर जाय के जरूरत नइ परय। 18 स्थानीय बोली भाखा म पाठ्य पुस्तक बनाके पढ़ईया लइका मन ल उपलब्ध करावत हन।
गाय मन ल लावारिस झन छोड़ंय, गौवंश के रक्षा करना हम सब के दायित्व गोचर जमीन म अवैध कब्जा ल हटाए खातिर सख्ती ले कार्यवाही
मुख्यमंत्री श्री साय ह मनखे मन ल आग्रह करत कहिन के आज गाय सड़क म विचरण करत हे, हमला गाय मन ल लावारिस नइ छोड़ना चाही। लावारिस जानवर मन के सेती दुर्घटना होवत हे। गौवंश के रक्षा के दायित्व हम सब के हे। मुख्यमंत्री श्री साय ह कहिन के प्रदेश म गोचर जमीन म अवैध कब्जा ल हटाए के काम सरकार करत हे। कहू अवैध कब्जा के शिकायत मिलही त सरकार ओला खाली कराही।
