सुकमा,11 सितंबर 2020। जिला म दु अलग-अलग जगह म सुरक्षा बल अउ नक्सली मन के बीच मुठभेड़ होइस। जेमा जवान मन ह एलारमडग़ू अउ भेजी म नक्सली कैम्प ध्वस्त करके नक्सल सामग्री बरामद करे म सफल होइस हे। उहें दूसर घटना म नक्सली द्वारा बड़का संख्या म ग्रामीण मन ल लाके किस्टाराम ले पालोड़ी सड़क ल काटे के सूचना मिलिस त किस्टाराम अउ पालोड़ी ले डीआरजी, एसटीएफ अउ 208 कोबरा के टीम सूचना स्थल बर रवाना होय रिहिस। पुलिस पार्टी ल अपन डाहर आत हुये देखिस त नक्सली द्वारा फायरिंग करे गिन। पुलिस पार्टी के डाहर ले घलो जवाबी फायरिंग करे गिस।
फायरिंग रूक-रूक के लगभग 2 घण्टा तक चलिस। एकर बाद म नक्सली जंगल के फायदा उठा के भाग निकलिस। पुलिस ल मिले जानकारी के अनुसार नक्सली कैम्प के सूचना म एलारमडग़ू अउ भेजी ले डीआरजी, एसटीएफ अउ 202 वाहिनी कोबरा के पार्टी ग्राम एंटापाड़ के डाहर निकलिस । सर्चिंग के दौरान पुलिस पार्टी ह एंटापाड़ जंगल के तिर नक्सली मन के कैम्प ल देखिस। जवान मन ल देख के नक्सली मन ह फायरिंग शुरू कर दीन। पुलिस पार्टी के डाहर ले घलो जवाबी कार्यवाही करके कैम्प ल ध्वस्त करे गिन। नक्सली जंगल अउ पहाड़ के आड़ म भाग निकलिस। मउका म सर्चिंग चलिस त नक्सली कैम्प ले 1 बायनाकुलर, नक्सली टैंट, दैनिक उपयोगी समान बरामद करे गिन।
