दुर्गम क्षेत्र अऊ कठिन भौगोलिक परिस्थिति के बावजूद मात्र तीन महीना म पूरा होइस सोडी हुंगी अऊ दशरी बाई के मकान
विशेष परियोजना के तहत ए साल मार्च म स्वीकृति के बाद मई म शुरू होए रहिस काम
छत्तीसगढ़ सरकार के आग्रह म केंद्र सरकार ह विशेष परियोजना के तहत मंजूर करे हे 15 हजार आवास
छत्तीसगढ़ सरकार नक्सल प्रभावित क्षेत्र मन म विश्वास, विकास अऊ पुनर्वास के नीति म करत हे काम: सरकार सबो पात्र हितग्राही मन ल पक्का घर देहे बर बाना उंचाए हे – मुख्यमंत्री श्री साय
कांकेर, छत्तीसगढ़ के नक्सल प्रभावित दूरस्थ वनांचल के हर परिवार ल विकास के मुख्य धारा ले जोड़े सरकार सरलग पहल करत हे। राज्य म नक्सल पीड़ित परिवार अऊ आत्मसमर्पित नक्सली मन के पुनर्वास बर विशेष परियोजना के तहत करीब तीन हजार घर बनत हे। छत्तीसगढ़ सरकार ह केंद्र सरकार ले विशेष आग्रह करके आत्मसमर्पित नक्सली मन अऊ नक्सल हिंसा ले प्रभावित परिवार मन बर जेन प्रधानमंत्री आवास योजना के पात्रता के शर्त मन म नइ आ पात रहिन, ऊंखर बर विशेष परियोजना के तहत 15 हजार आवास पास कराए हे।
विशेष परियोजना के तहत राज्य म अब तक पात्र पाए गे पांच हजार परिवार मन म ले तीन हजार परिवार मन बर आवास स्वीकृत करके 2111 परिवार मन ल आवास निर्माण बर पहली किस्त अऊ 128 परिवार मन ल दुसरा किस्त घलोक जारी करे हे। सुदूर वनांचल म रहइया ए परिवार मन के घर तेजी ले बनत हे। नक्सल हिंसा ले प्रभावित सुकमा के सोडी हुंगी अऊ कांकेर के दशरी बाई के विशेष परियोजना के अंतर्गत स्वीकृत पीएम आवास दुर्गम क्षेत्र अऊ कठिन भौगोलिक परिस्थिति के बावजूद मात्र तीन महीना म ही बनके तियार हो गए हे। ए साल मार्च म स्वीकृति के बाद मई म ए आवास मन के निर्माण चालू होय रहिस।
दुर्गम क्षेत्र अऊ उलटा हालात के बीच घलोक तीन महीना म बनगे घर
कांकेर जिला मुख्यालय ले लगभग 200 किलोमीटर दूर कोयलीबेड़ा विकासखण्ड के उलिया ग्राम पंचायत म रहइया श्रीमती दसरी बाई नुरूटी के पति श्री दोगे नुरूटी के विधानसभा चुनाव के समय माओवादी घटना म मृत्यु हो गए रहिस। पीएम आवास योजना म नक्सल पीड़ित परिवार मन बर विशेष परियोजना के तहत ए साल मार्च म ओखर घर स्वीकृत होइस। मई म ओखर घर के निर्माण शुरू होइस। अब मात्र तीन महीना के कमती बेरा म ही ओखर घर के निर्माण पूरा हो गए। दसरी बाई के हौसला के सेती कठिन परिस्थिति के बावजूद बहुत कम समय म घर तैयार होइस अऊ ओखर परिवार ल पक्का मकान मिलीस।
चूहत छत वाले कच्चा मकान म रहइया सोडी हुंगी ल मिलिस नवा पक्का घर
सुकमा जिला के गादीरास ग्राम पंचायत के आश्रित गांव ओईरास के श्रीमती सोडी हुंगी ह घलोक अपन पक्का घर तीन महीना म बना लेहे हे। साल 2005 म ओखर पति श्री मासा सोडी के नक्सली मन ह मुखबिरी के संदेह म हत्या कर देहे रहिन। ओखर परिवार गरीबी म कइ बछर तक कच्चा घर म रहे ल मजबूर रहिस, जिहां बरसात म चूहत छत अऊ जहरीला हिरू-बिच्छू ले जान के खतरा बने रहय।
प्रधानमंत्री आवास योजना (ग्रामीण) म विशेष परियोजना के तहत आवास स्वीकृत होए म सोडी हुंगी ल चरणबद्ध रूप ले तीन किस्त म कुल एक लाख 35 हजार रुपिया मिलिस। ग्राम पंचायत के तकनीकी मार्गदर्शन अऊ समय-समय म निगरानी के चलते ए साल जुलाई म ओखर घर के निर्माण पूरा होइस। अब वो परिवार के संग अपन पक्का नवा घर म रहत हे।
