धमतरी, 5 सितंबर 2020। धमतरी जिला म 30 अगस्त के होय पुलिस नक्सली मुठभेड़ ल माओवादी मन ह फर्जी मुठभेड़ बताये हे. ये एनकाउंटर म मारे गे एक लाख रुपिया के इनामी माओवादी रवि उर्फ मलेश कुंजाम ल फर्जी मुठभेड़ म मारे के आरोप लगात हुए नक्सली मन ह पेड़ काट के सड़क जाम कर दिस. बतादन कि पिछला दिन घोरागांव म पुलिस ह गोबरा लोकल ऑर्गनाइजेशन स्क्वॉड ( एलओएस) के एरिया कमांडर रवि उर्फ मलेश कुंजाम ल ढेर कर दे रिहिस. ये मुठभेड़ के विरोध म माओवादी मन के सीतानदी मैनपुर डिवीजन के नक्सली मन ह देर रात पेड़ काट के धमतरी गरियाबंद सड़क ल जाम कर दिस. अउ मउका म बैनर लगा के लोगन ले ये मुठभेड़ ल विरोध करे के अपील घलो करिन.
नगरी एसडीओपी नीतीश ठाकुर मउका म पहुंच के यातायात बहाल करे के काम शुरू कर देहे हे. पुलिस ह आशंका जताये हे कि हो सकत हे नक्सली मन ह इलाका म आईईडी बम ब्लास्ट करे बर बम लगाये होही. एखर सेती बम डिस्पोजल स्क्वॉड के टीम ल बुलाये गे हे. नक्सली मन ह बैनर म धमतरी एसपी बीपी राजभानु के नेतृत्व म फर्जी मुठभेड़ करे के आरोप लगाये हे.