बीजापुर, 2 जुलाई 2020। छत्तीसगढ़ के बीजापुर म तड़का बिहनिया बहुत ही दर्दनाक खबर निकल के आगु आये हे. नक्सली मन ह तीर अउ टंगिया ले वार कर सहायक आरक्षक ल बहुत बुरा तरीका ले मार डरिस हे. ये वारदात ल नक्सली मन ह वो बेरा अंजाम दिस, जब जवान मेडिकल छुट्टी म घर आये रहिस हे. नक्सली मन ह जवान ल अइसे मारे हे कि लोगन मन ह देख के सहम गे. घटना ह जांगला थाना क्षेत्र के हरे .
पुलिस ले मिले जानकारी के अनुसार घटना ह बीते रात करीब 10 बजे के हरे. माटवाड़ा निवासी सोमारू पोयाम फरसेगढ़ म सहायक आरक्षक के पद म रहिस हे. मेडिकल लीव म सोमारू घर आये रहीस हे. जेकर सूचना नक्सली मन ल मिल गे. रात म ही 50 के संख्या ले जादा नक्सली मन ह ओकर घर पहुंच गे. नक्सली मन ह सहायक आरक्षक के शरीर म 6 तीर अउ कुल्हाड़ी ले तबाड़तोड़ वार करके बेरहमी ले मार डरिस हे. बीच-बचाव करे ल आये सोमारू के पिता ल घलो एक तीर लग गे मां घलो ह घायल होगे.
बीजापुर एसपी कमलोचन कश्यप ह बताइस कि सहायक आरक्षक सोमारू पोयाम ल 6 तीर अउ सिर के पीछू हिस्सा ल टंगिया ले मार के हत्या करे गिस हे. एसपी ह बोलिस हे कि नक्सली मन के कायराना हरकत हे. जवान मेडिकल लीव म अपन गांव आये रहिस हे. पुलिस बल मउका म पहुंच गए हे, पुरा मामला के जांच कर करत हे.
