नक्सली मन ह पति ल मारिस फेर रीता के हिम्मत ल नइ मार पाइस

रायपुर, छत्तीसगढ़ के बीजापुर जिला के कुटरू गांव ले कुछ महीना पहिली एक बुरी खबर आईस। अड्डावली गांव म रहइया घनश्याम मंडावी ल नक्सली मन ह मार डारिन। घनश्याम अड्डावली ग्राम पंचायत के आदिवासी महिला सरपंच रीता मंडावी के पति रहिस। गांव म कुछ नवा करे अऊ आदिवासी समाज म छत्तीसगढ़ सरकार के योजना मन के प्रचार प्रसार करे के जिम्मा उठाके मनखे मन ल जागरूक करइया घनश्याम मंडावी नक्सली मन के नजर म खटकत रहिस। गांव वाले समाज के मुख्यधारा ले कटे रहयं ते पाए के नक्सली मन ह घनश्याम मंडावी के हत्या कर दीन।
नक्सली मन ल लगिस कि अइसन करके वो गांव, समाज अऊ घनश्याम के परिवार के हिम्मत ल तोड़ देहीं, फेर ओ मन ल ये पता नइ रहिस कि मॉं, पत्नी अऊ सरपंच तीनों के भूमिका निभात रीता मंडावी के हौसला कहूं जादा बड़े हे। पति के मौत के बाद घलोक डरे के बदला रीता जादा मजबूती ले खड़े होइस। रीता अपन 4 साल के बेटा अऊ 2 साल के बेटी के संग अपन काम करत रहिस जेन वो अपन स्वर्गीय पति के संग करत रहिस। मनखे मन ल जागरूक करना अऊ शासन के योजना मन ल घर-घर तक पहुंचाना वो ह नइ छोडि़स।
विशेष संरक्षित जनजाति मुरिया के सदस्य रीता मंडावी, सरपंच के रूप म मिलइया मानदेय ल घलोक गांव के मनखे मन बर खरचा कर देथे। पति के निधन के बाद रीता ल बस एके बात के चिंता रहिस कि ओखर लइका मन के पढ़ाई कइसन होही, लेकिन अब रीता के ये चिंता घलोक दूर हो गे हे जेखर से वो पहिली ले घलोक जादा मजबूत हो गीस।
मुख्यमंत्री भूपेश बघेल ह कुटरू क्षेत्र के अपन प्रवास के समय नक्सली हिंसा के पीड़ित रीता मंडावी ल 5 लाख रूपिया कि आर्थिक सहायता प्रदान करे हे। मुख्यमंत्री के हाथ सहायता राशि मिले के बाद रीता मंडावी के कहना हे कि वो ए पइसा ल अपन लइका मन के शिक्षा अऊ ऊंखर बेहतर भविष्य बर खरचा करही अऊ अपन जीवन ल पहिली के जइसे ही समाज सेवा अऊ मनखे मन ल जागरूक करे म समर्पित करही।