गायत्री मंदिर वार्ड दुर्ग के नजूल भूखंड बर काली तको होही एक अउ नीलामी
दुर्ग 23 जून 2020। दुर्ग सहर के नजूल भूखंड मन के नीलामी शुरू हो गए हे। आज तहसील कार्यालय म नजूल भूखंड के पहली नीलामी बर 17 आवेदन आए रहिस। एखर बर बेस प्राइज कोट करे गए रहिस। नीलामी मंझनिया शुरू होइस। नीलामी म आखरी 72 लाख रुपिया के आखरी बोली गइस। ये नीलामी आवासीय प्रयोजन के 2370 वर्गफीट जमीन बर रहिस। जउन नजूल भूखंड नंबर 9 बटे एक बर रहिस। ये आखरी बोली ग्राहक विजय कुमार जैन ह लगाईस।
नजूल अधिकारी श्री अरुण वर्मा के बताती काली तको नजूल जमीन के बोली होही। जानबा हे कि एखर बारे म पेपर मन म इश्तहार घलोक छपवाए गए रहिस। जिला म खाली नजूल जमीन मन के चिन्हारी के कार्रवाई करे गए हे। जेला जिला प्रशासन के निर्णय के बाद बेरा-बेरा म नीलामी के माध्यम ले बिक्री करे जाही। ए संबंध म पेपर मन म इश्तहार के प्रकाशन करे जाही।
नजूल अधिकारी श्री अरुण वर्मा ह बताइस के आज तहसील आफिस के सभाकक्ष म नीलामी के आयोजन करे गए रहिस। उमन बताइन के आवासीय प्रयोजन बर विक्रय करे जात ये जमीन उपभोक्ता मन बर बहुत उपयोगी हो सकत हे ते खातिर मनखे मन एमा बने रुचि देखावत हें। ये प्रक्रिया पूरा परखर होवय ए खातिर, ए संबंध म नियम के मुताबिक पूरा प्रक्रिया के पालन करे जावत हे।