जिला प्रशासन कोति ले चलइया नवगुरुकुल ले मिलिस दिसा
फाइनेंस जूनियर एसोसिएट के रूप म काम करके बनिस आत्मनिर्भर
जशपुरनगर, मुख्यमंत्री श्री विष्णु देव साय के मंशा के मुताबिक जिला प्रशासन जशपुर कोति ले चलइया नवगुरुकुल संस्थान ह गाँव अउ आम परिवार के युवा मन ला आधुनिक हुनर ले लैस करके आत्मनिर्भर बनाय के दिसा म बढ़िया काम करत हे। ए पहल ह सिरिफ रोजगार के नवा अउसर नइ देवत हे, बल्कि जिला के युवा मन ला भरोसा के साथे भविस्स बनाय बर आगू बढ़ावत हे। ए नवाचार के एक मजबूत उदाहरण आय कुनकुरी के नेहा खाखा। अभी के बखत म नेहा ह नवगुरुकुल म फाइनेंस जूनियर एसोसिएट टीम म ग्रोथ रोल म काम करत हे, जेमां ओला 2.52 लाख रुपया के सालाना पैकेज मिलत हे। अपन काम म ओ ह आन विद्यार्थी मन ला रद्दा देखाथे, ओमन के आत्मविश्वास ला मजबूत करथे अउ पढ़ाई-लिखाई म मदद करथे। नेहा के कहना हे के नवगुरुकुल ह ओला सिरिफ तकनीकी गियान नइ दीस, बल्कि जिनगी म आगू बढ़े के भरोसा घलो दीस। इहाँ के मदद करइया अउ प्रेरणा देचइया माहौल ह ओकर व्यक्तित्व ला निखारे म बड़ काम आईस।
भरोसा ले भरे नवा उड़ान
नेहा बताथे के ओकर बाबूजी के देहांत के बाद ओकर महतारी श्रीमती ललिता खाखा ह परिवार के जिम्मेदारी सँभालात हे। कम साधन अउ पारिवारिक चुनौती के बीच म नेहा ह शिक्षा ला अपन ताकत बनाइस। ओ ह डीएवी मुख्यमंत्री पब्लिक स्कूल, कांसाबेल ले बारहवीं तक के पढ़ाई पूरा करिस। नवगुरुकुल के बारे म ओला अपन महतारी ले जानकारी मिलिस। ओकर बाद ओ ह स्वामी आत्मानंद सरकारी स्कूल, मनोरा म होय एक सेमिनार म सामिल हो के संस्थान के पढ़े के तरीका ला समझिस। प्रवेस परीछा म पास हो के ओ ह नवगुरुकुल, जशपुर म पढ़ाई सुरू करिस। नेहा ह नवगुरुकुल म ‘स्कूल ऑफ फाइनेंस’ ला चुनिस। एक बछर के पढ़ाई के बखत ओ ह वित्तीय विवरण, मैनेजमेंट अकाउंटिंग, कॉस्ट अकाउंटिंग अउ टैली म माहिर हो गे। संगे-संग गोठ-बात करे के तरीका (communication skills), टीम वर्क अउ समस्या सुलझाय जइसे हुनर म घलो बड़ सुधार करिस। जेकर फल ओला ए मिलिस के ओला नवगुरुकुल म ही नौकरी मिल गे। जेमां ओ ह अपन पढ़ाई जारी रखे के संगे-संग कमाई घलो करत हे। ओ ह पंडित सुंदरलाल शर्मा ओपन यूनिवर्सिटी, कुनकुरी ले स्नातक (Graduation) के पढ़ाई घलो पूरा करत हे।
नवगुरुकुल: हुनर बढ़ाए के मजबूत मंच
जिला प्रशासन जशपुर कोति ले चलइया नवगुरुकुल संस्थान ह जिला के युवा अउ लइका मन बर हुनर बढ़ाए अउ आत्मनिर्भर बने के एक असरदार जरिया बन के उभरत हे। इहाँ बढ़िया पढ़ाई, अनुभवी गुरुजी मन के मार्गदर्शन अउ अनुसासित माहौल मिलथे। संस्थान म प्रोग्रामिंग, बिजनेस अउ फाइनेंस जइसन आधुनिक कोर्स के साथे जिनगी के जरूरी हुनर के घलो सिखवना देहे जाथे, जेकर ले विद्यार्थी मन रोजगार के काबिल बनथें। नेहा खाखा के ए कहानी देखाथे के कहूं मेहनत, सही रद्दा अउ संस्था के सहयोग मिलय त गाँव-गँवई के बेटी मन घलो आत्मनिर्भरता के नवा ऊँचाई ला छू सकथें। नवगुरुकुल जइसे पहल ह जशपुर जिला ला हुनरमंद अउ मजबूत युवा मन के नवा चिन्हारी देवत हे।
