कॉलेज मन म प्रवेश लेहे वाले छात्रा के संख्या मन म होइस बढ़ोतरी
कॉलेज मन म बाढ़त हे पढ़े पढ़ाए के सुबिधा
पाछू के 4 बछर म 33 ठ नवीन शासकीय महाविद्यालय के होइस इस्थापना
छात्र-छात्रा कमकस संख्या म 48 प्रतिशत के होइस बढ़ोतरी
रायपुर, नेहा राठौर के खबर/ छत्तीसगढ़ के कॉलेज मन म प्रवेश लिए के उमर के सीमा ह समाप्त कर दिए ले पढ़े के इच्छुक लोगन मन ल फेर से पढ़ई करे के मिलत हे मउका । राज्य सरकार ह छत्तीसगढ़ म उच्च शिक्षा ल बढ़ावा देहे ब नवा नवा कॉलेज खोले जाथ हे। संगे संग कॉलेज मन म आने आने बिषय के नवा-नवा बिभाग (संकाय) तको खोले जाथ हे। राज्य के कॉलेज मन म लड़की मन के प्रवेश लेहे के संख्या ह सरलग बाढ़ती होवत हे। मुख्यमंत्री श्री भूपेश बघेल अउ उच्च शि़क्षा मंत्री श्री उमेश पटेल के कोती ले उच्च शिक्षा के बिस्तार ब सरलग परयास करे जाथ हे। वर्तमान म नैक ले मूल्याकिंत कॉलेज के संख्या 192 हो गए हे।
सरकार के परयास के ही फल हे कि कॉलेज मे प्रवेश लेहे वाले छात्र मन के संख्या लगातार बाढ़त हे। जिहां 2018-19 म करीब 2 लाख 26 हजार 373 छात्र मन ह कॉलेज म प्रवेश लिए रहिस हे उहीं ए संख्या ह वर्ष 2022-23 म 48 प्रतिशत बाढ़के 3 लाख 35 हजार 139 हो गए हे।जेहर के 2018-19 के तुलना मे एक लाख 8 हजार 766 जादा हे। छत्तीसगढ़ में 285 शासकीय महाविद्यालय, 12 अनुदान प्राप्त अशासकीय महाविद्यालय अउ 252 अनुदान अप्राप्त अशासकीय महाविद्यालय चलत हे। उच्च शिक्षा विभाग के अनतरगत 09 राजकीय अउ 15 निजी विश्वविद्यालय संचालित होवत हे।
बिलासपुर ले रायगढ़ के दूरिहा ल देख के रायगढ़ मे शहीद नंदकुमार पटेल विश्वविद्यालय के इस्थापना करे गए हे। उच्च शिक्षा म लड़की मन ल प्रोत्साहन दिए ब 26 कन्या महाविद्यालय के संचालन करे जाथ हे। वर्ष 2018-19 मे जिहां 91,982 छात्र मन के तुलना म 1,34,391 छात्रा मन ह कॉलेज म प्रवेश लिहिस उहें 2022-23 मे ए ह बाढके छात्र मन के संख्या 1,28,310 अउ छात्रा मन के संख्या 2,06,829 हो गए हे। अउ छात्र मन के तुलना म छात्रा मन के संख्या 61 प्रतिशत अधिक हे। ए ह एक सुखद संकेत हे की महिला मन अपन शिक्षा ब जागरूक होवत हे।
