- मुख्यमंत्री के संग ‘नेट्रो रेल’ (लाइट रेल सिसटम) उपर विचार-विमर्श
- शास्त्री चौक ले टाटीबंध तक लाइट रेल चलाए के बारे म रिपोट प्रस्तुत करे के निर्देश
रायपुर, मुख्यमंत्री श्री भूपेश बघेल ले आज मंत्रालय (महानदी भवन) मनुआम टेक्नोप्रन्योर प्राइवेट लिमिटेड मुम्बई के प्रतिनिधिमंडल ह सौजन्य मुलाकात करिस। ये दौरान कंपनी के पदाधिकारी मन ह लाइट रेल सिसटम के बारे म प्रस्तुतिकरण दीन। बैठक म लाइट रेल चलाय के संभावना मन उपर चर्चा घलोक करे गीस।
बैठक म मुख्यमंत्री ह कम्पनी के अधिकारी मन ले नवा रायपुर ले दुर्ग तक लाइट रेल चलाय के बारे म चर्चा करिन। उमन कम्पनी के अधिकारी मन ले परीक्षण के तौर म शास्त्री चौक ले टाटीबंध तक एला चलाय बर सर्वे करके रिपोट प्रस्तुत करे के निर्देश दिए हें।
बैठक म वन मंत्री श्री मोहम्मद अकबर, मुख्यमंत्री के प्रमुख सचिव श्री गौरव द्विवेदी, परिवहन विभाग के प्रमुख सचिव श्री मनोज पिंगुआ, अपर परिवहन आयुक्त श्री एस.आर.पी. कल्लूरी अऊ कंपनी के श्री गाग्रेन, श्री मंडकोव, श्री करण जज, श्री सत्येन्द्र सिंह, श्री प्रसन्ना शेठ्ठी संग बहुत अकन पदाधिकारी उपस्थित रहिन।
बैठक म नुआम टेक्नोप्रन्योर के अधिकारी मन ह बताइन कि लाइट रेल सिसटम रूस के तकनीक उपर आधारित हे। ये रेल बैटरी चलित हे। ये रेल म आठ बोगी रहिथे, जऊन एलिवेटेड रूट म चलथे, आठ बोगी के रेल म एक हजार 68 यात्री यात्रा कर सकत हे। ये रेल पूरा वातानुकूलित रहिथे अऊ ये मां वाईफाई सिसटम संग सबो आधुनिक सुविधा रहिथे। रेल लाइन के किनारे सोलर पैनल रहिथे, जेमां स्ट्रीट लाईट घलोक लगाए जा सकत हे। एखर अलावा रेल मार्ग म टेलीकाम केबल आदि लगाय के व्यवस्था रहिथे। एलीवेटेड रेल लाइन बनाए बर 3बाई3 फीट चौड़ा जमीन के जरूरत होही।
कम्पनी के अधिकारी मन ह प्रस्ताव दीन कि एखर निर्माण के पूरा खरचा कम्पनी वहन करही। कम्पनी एला 30 साल चलाय के बाद शासन ल सउंप देही। ये रेल ल लाइट रेल बर 70 साल गारंटी दिए जाही। कम्पनी के अधिकारी मन ह बताइन कि कम्पनी कोति ले लाइट रेल परियोजना म दू साल म 100 किलोमीटर रेल लाइन स्थापित करके संचालित करे जा सकत हे। ये रेल ल कार्गो के जइसे उपयोग घलोक लाये जा सकत हे।
‘नेट्रो रेल’ नाम गुरतुर गोठ कोति ले रखे गए हे, डीपीआर या सरकार के ये नाम ले कोई लेना देना नइ हे।
