जशपुरनगर म ट्राईबल डांस फेस्टिवल : विधायक ह गीत के संग सामाजिक कुरीति मन ले बांचे के दीन संदेश

जशपुरनगर, नेशनल ट्राईबल डांस फेस्टिवल के तहत् आज जशपुर के रणजीता स्टेडियम म आयोजित विकासखंड स्तरीय कार्यक्रम के समय विधायक श्री विनय भगत ह उपस्थित जन समुदाय ले गीत के माध्यम ले सामाजिक कुरीति जइसे बाल-विवाह, शराब के सेवन ले बांचे के अपील करिन। आदिवासी नर्तक दल मन कोति ले प्रस्तुत कार्यक्रम के समय विधायक श्री भगत ह मादर के थाप म कुडूक म प्रेरणास्पद गीत गाइन। विधायक ह अपन गीत के माध्यम ले एक नाबालिक बच्ची जऊन पढ़ लिखके आत्म निर्भर बने के सपना देखत हे, ओखर जबरिया बाल-विवाह कराए जाय ल लेके ओखर मन के व्यथा संग आन सामाजिक कुरीति मन के उन्मूलन के संदेश दीन। विधायक श्री विनय भगत ह कहिन कि नशा नाश के जड़ हे। शराब सबले खराब हे। बाल विवाह एक सामाजिक बुराई हे। ये म रोक लगाना हम सब के सामूहिक जिम्मेदारी हे। उमन मनखे मन ले लइका मन ल शिक्षा म ध्यान देहे के आग्रह करिन।
नेशनल ट्राईबल डांस फेस्टिवल के ये खंड स्तरीय आयोजन म जशपुर ब्लॉक के 18 आदिवासी नर्तक दल मन ह हिस्सा लीन अऊ शानदार सांस्कृतिक गीत-नृत्य के प्रस्तुति दीन। कार्यक्रम म नगरपालिका अध्यक्ष श्री हीरू राम निकुंज, जनपद अध्यक्ष जशपुर श्रीमती शारदा प्रधान, जनपद अध्यक्ष मनोरा श्रीमती ममता भगत, श्रीमती श्वेताविनय भगत, जनपद उपाध्यक्ष सुरेश तिर्की, जनपद सदस्य श्रीमती सुमित्रा भगत, सर्व श्री योगेश सिंह, राजू सिंह सूरज चौरसिया, कल्पना लकड़ा विशिष्ट अतिथि के रूप म उपस्थित रहिन।