हरदीबाजार संग 20 गांव मन के 23 हजार ले जादा मनखे मन ल आए-जाए के मिलत हे सुविधा
कोरबा, 10 जुलाई 2021। जिला प्रशासन कोति ले जिला के विकास बर सरलग विकास काम कराए जात हे। मनखे मन के आवागमन के साधन म बढ़ोत्तरी करत लीलागर नदी म उच्च स्तरीय पुल के निर्माण कराए गए हे। लीलागर नदी म नेवसा-जोरहाडबरी मार्ग म उच्चस्तरीय पुलमय पहुंच मार्ग बन जाय ले आसपास गांव के मनखे मन के रद्दा आसान हो गए हे। ये मार्ग म पहिली पुल नइ होए के सेती नदिया ले मनखे मन के आवागमन होत रहिस। बरसा के मौसम म ये मार्ग घलोक अवरूद्ध हो जात रहिस। मनखे मन के सुगम अऊ सुव्यवस्थित आवागमन बर नेवसा-जोरहाडबरी के निर्माण कराए गए हे। पुल बन जाय ले विकासखण्ड पाली के गांव हरदीबाजार संग नेवसा, उतरदा, कुली, बोईदा, सिरली, झांझ, निरतु, कोरबी, धतूरा, मुड़ापार अऊ जोरहा डबरी जइसे करीबन 20 गांव के 23 हजार 800 ले जादा मनखे मन ल बारहमासी आवागमन के सुविधा मिलत हे। ग्राम जोरहाडबरी के सरपंच श्रीमती गनपत देवी ह बताइस कि पहिली पुल नइ बने रहिस त गांव वाले मन बारिश के मौसम म नदी के पार नइ जा पात रहिन। पुल के बन जाय ले बारहमासी आवागमन शुरू हो गए हे। स्कूल अऊ कालेज के विद्यार्थी पुल पार करके हरदीबाजार पढ़े बर जा पात हें। मनखे मन ल खरीददारी करे बर घलोक पुल पार करके नदी के ओ पार दूसर गांव जाय म सुविधा मिलीत हे। सरपंच ह बताइस कि पुल निर्माण ले मनखे मन ल ईलाज कराए बर हरदीबाजार स्वास्थ्य केन्द्र म जाय म घलोक सहुलियत होवत हे। ग्राम उतरदा के सरपंच श्री ओंकार सिंह नेटी ह बताइस कि बड़ा बाजार होए के सेती कई ग्रामीण जन जांजगीर-चांपा जिला ले बलौदा जाथे। पुल बने ले पहिली बलौदा जाय बर खम्हरिया गांव ले होत करीबन 25 ले 30 किलोमीटर के दूरी तय करना परत रहिस। पुल बन जाय ले अब उतरदा ले बलौदा के दूरी करीबन 14 किलोमीटर हो गए हे। सरपंच ह बताइस कि गांव के मनखे खरीददारी अऊ व्यवसाय करे बर आसानी ले बलौदा जा पावत हें।
कार्यपालन अभियंता लोक निर्माण विभाग श्री ए. के. वर्मा ह बताइस कि लीलागर नदी म नेवसा-जोरहाडबरी पुल पांच करोड़ 79 लाख के लागत ले बनाय गए हे। पुल के लंबाई 90 मीटर हे। 22.50 मीटर के चार स्पानयुक्त ये पुल ल पाईल फाउण्डेशन ले बनाय गए हे। डबल लेन सहित ये पुल के चौड़ाई 8.40 मीटर हे अऊ नदी तल ले पुल के ऊंचाई 4.50 मीटर हे। ये पुल म पहुंच मार्ग के कुल लम्बाई 556.80 मीटर हे जेमां ले नेवसा कोति 170.40 मीटर जोरहाडबरी कोति 126.40 मीटर, बुडगहन कोति 140 मीटर अऊ जंगल कोति 120 मीटर हे।
