अबूझमाड़ के कुतुल तक पहुँचिस बस सेवा

नियद नेल्ला नार योजना ले बदलत हे गांव मन के तस्वीर 
गांव वाले मन म दिखिस उछाह, मुख्यमंत्री के जताइन आभार
नारायणपुर, छत्तीसगढ़ के माओवाद प्रभावित अबूझमाड़ क्षेत्र म विकास के नवा रफ्तार देखे ल मिलत हे। नियद नेल्लानार योजना के अंतर्गत नारायणपुर जिला के अंदरूनी इलाका मन म 14 नवा पुलिस कैंप के स्थापना के बाद उहां सड़क, पुल-पुलिया अउ मोबाइल कनेक्टिविटी के लउहे विस्तार होवत हे। 
इही कड़ी म जिला प्रशासन कति ले 13 मई 2025 के पहली पइत ग्राम कुतुल तक नारायणपुर ले सीधा बस सेवा चालू करे गीस। ये बस सेवा जिला मुख्यालय ले लगभग 49 किलोमीटर दूर स्थित ग्राम कुतुल के संग कुरूसानार, बासिंग, कुंदला, कोहकामेटा, ईरकभट्टी, कच्चापाल अऊ कोडलियर जइसे दूरस्थ गांव मन ल घलोक जोड़त हे। बस सेवा शुरू होए ले गांव वाले मन म विशेष उत्साह के माहौल हे।
पहिली ए गांव मन के मनखे पगडंडी मन के सहारे आवागमन करत रहिन। बारिश के मौसम म नदी अऊ नाला मन के उफान म होए ले मरीज मन ल अस्पताल तक पहुंचाना बहुत कठिन होत रहिस। कई पइत गांव वाले मन ल बीमार मनखे ल खांधा अउ कांवर म उठाके अस्पताल तक लाना परत रहिस। अब बस सेवा शुरू होए ले न केवल आवागमन सुगम होय हे, भलुक गांव वाले मन ल दैनिक जरूरत के पूर्ति अऊ प्रशासनिक काम मन बर नारायणपुर तक समय म पहुंचे के सुविधा घलोक मिलत हे। 
अइसनहे नारायणपुर ले मसपुर तक घलोक 14 गांव मन बर बस सेवा शुरू करे गए हे, जेखर से ए इलाका मन के मनखे मन ल जिला मुख्यालय ले बेहतर संपर्क मिले हे। योजना के तहत 4जी मोबाइल टॉवर घलोक लगाए गए हे, जेकर से ग्राम कस्तुरमेटा, मसपुर, ईरकभट्टी, मोहन्दी, होरादी, गारपा अऊ कच्चापाल के मनखे अब मोबाइल नेटवर्क ले जुड़ गए हें। एखर से न केवल संचार व्यवस्था म सुधार होय हे, बल्कि शैक्षणिक, स्वास्थ्य अऊ प्रशासनिक सेवा के पहुँच घलोक बेहतर होए हे।
गांव वाले मन ह मुख्यमंत्री श्री विष्णुदेव साय अऊ जिला प्रशासन के प्रति आभार व्यक्त करत कहिन के कइ बछर बाद अब ओ मन ल विकास के मुख्यधारा म सामिल होए के अवसर मिलत हे। नियद नेल्लानार योजना ह ऊंखर जीवन म नवा अंजोर फैलाए हे।