गौठान परिसर म गोबर गैस प्लांट लगाए अऊ नगर निगम क्षेत्र म दू अऊ गौठान के घोषणा
रायपुर, मुख्यमंत्री श्री भूपेश बघेल ह गोरधन पूजा अऊ गौठान दिवस के अवसर म आज राजधानी के बोरियाखुर्द स्थित गोकुल नगर म गाय मन के पूजा-अर्चना करिन। उमन गाय मन ल चारा-खिचरी खवाइन अऊ नवा बने गौठान के लोकार्पण करिन। उमन कहिन कि गोवर्धन पूजा मनाए के परम्परा पूरा देश म हे। हम एला गौठान दिवस के रूप म मनावत हन। एक कोती गोरधन पूजा अऊ गौठान दिवस मनाए के छत्तीसगढ़ के परम्परा अऊ दुसर कोति सरकार के नरवा, गरूवा, घुरवा, बाड़ी योजना। ये योजना के तहत पशुधन विकास अऊ संवर्धन के संगेच नदिया-नरवा मन के संवर्धन करे जात हे। नरवा विकास ले पेयजल, सिंचाई अऊ उद्योग मन ल पानी के व्यवस्था सुनिश्चित होही।
मुख्यमंत्री ह गोकुल नगर गौठान परिसर म गोबर गैस प्लांट लगाए के अऊ रायपुर नगर निगम क्षेत्र म दू अऊ गौठान बनाए के घोषणा करिन। उमन कहिन कि गोबर गैस प्लांट ले तीर-तखार के मनखे मन ल सस्ता म घरेलू रसोई गैस के आपूर्ति होही। उमन गौठान के गोबर ले वर्मी खाद निर्मित होही अऊ एखर से आय के साधन घलोक निर्मित होही। उमन कहिन कि गौठान म मवेशी मन बर शेड तो बने हे एखर से बारिस के मौसम म ओ मन ल छइंहा मिलही फेर गर्मी के मौसम म गर्मी ले मवेशी मन ल बचाव बर छायादार पेंड़ लगाये ल कहिन। ये गौठान के निर्माण 50 लाख रूपिया के लागत ले करे गए हे। इहां 500 मवेशी मन ल व्यवस्थित रखे जा सकत हे।
ये बेरा म नगरीय प्रशासन मंत्री डॉ. शिवकुमार डहरिया ह कहिन कि मुख्यमंत्री कोति ले छत्तीसगढ़ के संस्कृति ल पहिचान देवाए के काम करे जात हे। उमन किसान मन ल आर्थिक रूप ले समृद्ध करे बर बहुत अकन काम करे हें। किसान मन के समृद्धि ले प्रदेश घलोक समृद्ध होही। कार्यक्रम ल विधायक श्री सत्यनारायण शर्मा अऊ महापौर श्री प्रमोद दुबे ह घलोक सम्बोधित करिस। लोकार्पण समारोह म विधायक श्री कुलदीप जुनेजा अऊ श्री विकास उपाध्याय, नगर निगम आयुक्त श्री शिव अनंत तायल संग बहुत अकन जनप्रतिनिधि अऊ गणमान्य नागरिक उपस्थित रहिन।
