छत्तीसगढ़ के नवा औद्योगिक नीति म स्टील सेक्टर ल जबर पंदोली

ग्रीन स्टील उत्पादन म विशेष अनुदान घलोक मिलही: मुख्यमंत्री श्री साय
मुख्यमंत्री श्री साय ग्रीन स्टील अऊ माइनिंग समिट म संघरिन, स्टील उद्यमी मन ल छत्तीसगढ़ म यूनिट लगाय के नेवता
रायपुर, मुख्यमंत्री श्री विष्णु देव साय ह देश के कई ठन स्टील उद्यमी मन ल छत्तीसगढ़ म उत्पादन यूनिट लगाए के नेवता देहे हें। उमन आज स्थानीय होटल म आयोजित ग्रीन स्टील अऊ माइनिंग समिट म संघर के उद्यमी मन ल छत्तीसगढ़ म ए उद्योग के भरपूर संभावना अऊ एखर बर विकसित अधोसंरचना (इन्फ्रास्ट्रक्चर) के जानकारी दीन। ये समिट कान्फेडरेशन ऑफ इंडियन इंडस्ट्रीज से पूर्वी क्षेत्र के सदस्य मन बर आयोजित होए रहिस।
समिट म उपस्थित उद्यमी मन ल संबोधित करत मुख्यमंत्री श्री साय ह कहिन के छत्तीसगढ़ के नवा औद्योगिक नीति म स्टील सेक्टर ल विशेष रूप ले प्रोत्साहन देहे गए हे। कहूं कोनो उद्यमी ग्रीन स्टील के उत्पादन करत हे, त ओला विशेष अनुदान देहे के प्रावधान घलोक छत्तीसगढ़ के नवा औद्योगिक नीति म करे गए हे।
मुख्यमंत्री ह कहिन के प्रधानमंत्री श्री नरेंद्र मोदी ह देश ल स्टील हब बनाए के लक्ष्य निरधारित करे हे। ऊंखर अगुवई म देश म स्टील उत्पादन 100 मिलियन टन ले बाढ़के 200 मिलियन टन हो गए हे, अऊ साल 2030 तक एला बढ़ाके 300 मिलियन टन तक पहुँचाए के लक्ष्य हे। उमन बताइन के छत्तीसगढ़ म घलोक स्टील के अभी हाल उत्पादन क्षमता 28 मिलियन टन ले बढ़ाके 45 मिलियन टन करे के लक्ष्य रखे गए हे, जेखर बर सबो जरूरी तैयारी पूरा करे गए हे।
समिट म सीआईआई छत्तीसगढ़ के चेयरमैन श्री संजय जैन, को-चेयरमैन श्री सिद्धार्थ अग्रवाल, वाइस चेयरमैन श्री बजरंग गोयल, मुख्य सचिव श्री अमिताभ जैन, मुख्यमंत्री के प्रमुख सचिव श्री सुबोध सिंह, मुख्यमंत्री के सचिव श्री राहुल भगत अऊ सचिव उद्योग श्री रजत कुमार उपस्थित रहिन।
ये समाचार ल पूरा आप हमर हिन्‍दी पोर्टल म येदे कड़ी ले पढ़ सकत हव।