- वेबसाइट के संग सरकारी अऊ निजी चिकित्सक देंहीं निःशुल्क परामर्श
- मरीज मन ल सुझाए गीस दवई घलोक घर तक पहुंचाके देहे जाही
- मुख्यमंत्री श्री बघेल ह ऑनलाइन चिकित्सा सुविधा जल्दी प्रदान करे बर दीन हुकुम
रायपुर, 18 अप्रैल 2020। मुख्यमंत्री श्री भूपेश बघेल के पहल म छत्तीसगढ़ म मरीज मन ल चिकित्सीय परामर्श के सुविधा देहे बर जल्दीच एक वेबसाइट शुरू करे जाही। ये बेबसाइट म मरीज मन ल ऑनलाइन चिकित्सीय परामर्श निःशुल्क मिल सकही। ये व्यवस्था म गंभीर बीमारी के मरीज मन ल चिकित्सीय परामर्श के अलावा ओ मन ल अस्पताल लाय अऊ ले जाय बर एम्बुलेंस अऊ लेब आदि के सुविधा मिलही। ये प्रकार से ये वेबसाइट एक वर्चुअल अस्पताल के जइसे काम करही।
जानबा हे के कोरोना लाकडाउन के सेती बहुत अकन मनखे मन ल चिकित्सा के सामान्य सेवा प्राप्त करे म कठिनाई होवत हे, निकट भविष्य म परिस्थिति के सामान्य होए के संभावनाएं कम हवय। अइसन म ये ऑनलाइन व्यवस्था मरीज मन बर काफी कारगार साबित होही।
मुख्यमंत्री श्री बघेल ह ये संबंध म मुख्य सचिव ल मरीज मन ल आनलाइन चिकित्सीय परामर्श अऊ आन सुविधा उपलब्ध कराए बर एक हफ्ता के भीतर कार्य योजना तियार करे के हुकुम देहे हें, जेखर से जल्दीच आनलाईन चिकित्सा उपलब्ध कराए जा सकय।
मुख्यमंत्री ह ये वेबसाइट ले सरकारी अऊ निजी अस्पताल के चिकित्सक मन ल जोड़े ल कहे हें। गंभीर बीमारी वाले मरीज ऑनलाइन चिकित्सीय परामर्श ले सकही। परामर्श लेहे के पहिली मरीज मन ल मेडिकल हिस्ट्री जइसे सीटी स्केन, एक्स-रे रिपोट, अऊ जुन्ना उपचार के संबंध म मेडिकल पर्ची आदि अपलोड करना होही।
मरीज मन ल ये वेबसाइट ले सरकारी अऊ निजी चिकित्सक मन ले निःशुल्क परामर्श मिल सकही। हरेक सरकारी अस्पताल के चिकित्सक आनलाइन परामर्श बर निरधारित समय म उपलब्ध रइहीं। निजी चिकित्सक घलोक ये सेवा ले निःशुल्क परामर्श देहे के शर्त म उपलब्ध रह सकत हें। निजी चिकित्सक अस्पताल के अलावा अपन घर ले घलोक परामर्श दे सकत हें।
चिकित्सक मरीज मन ले बात करके ओ मन ल चिकित्सीय परामर्श देहीं। जरूरत होए म मरीज मन ल अस्पताल आए के सलाह घलोक दे सकहीं। जरूरत होए म मरीज ल एम्बुलेंस सुविधा घलोक वेबसाइट के माध्यम ले उपलब्ध कराए जाही। एखर अलावा मरीज मन ल सुझाए गए दवई घलोक घर तक पहुंचाके देहे जाही।
