राज्यपाल ‘उच्च शिक्षा म नवा पहल’ विसय उपर आयोजित सम्मेलन म होइन सामिल
रायपुर, राज्यपाल सुश्री अनुसुईया उइके आज श्री रावतपुरा सरकार विश्वविद्यालय रायपुर म ‘उच्च शिक्षा म नवा पहल’ विसय म आयोजित सम्मेलन म सामिल होइन। उमन अपन संबोधन म कहिन कि उच्च शिक्षा म नवा पहल आज के जरूरत हे। पढ़ईया लईका मन के पूरा विकास बर समय के मुताबिक उच्च शिक्षा म बदलाव के हमेसा जरूरत रहिथे। छत्तीसगढ़ म उच्च शिक्षा म गुणवत्ता लाय बर ठोस उदीम किरे जात हे। संगेच नैक म अच्छा ग्रेडिंग बर कार्य योजना बनाए अऊ विश्वविद्यालय म खाली शैक्षणिक पद मन ल भरे बर कहे गए हे। राज्यपाल ह कहिन कि ओ मन खुद सबो विश्वविद्यालय म जांच बर जाहीं अऊ ये देखहीं के उहां कऊन प्रकार के कमी हे, ओला पूरा करे बर हरसंभव उदीम करे जाही। ये सेमिनार ले निकले निष्कर्ष प्रदेश भर नहीं भलुक पूरा देश म उच्च शिक्षा म गुणवत्ता लाय म उपयोगी सिद्ध होही।
राज्यपाल ह कहिन कि शिक्षण कार्य उच्च् शिक्षण संस्था मन के प्रमुख मौलिक काम हे। ये पाए जात हे कि जादातर विश्वविद्यालय म परम्परागत पाठ्यक्रम संचालित होत हे। प्रयास करव कि पाठ्यक्रम अभी हाल के समय के मुताबिक होवय, वोमा रचनात्मकता होवय। विश्वविद्यालय म संचालित पाठ्यक्रम ल सरलग नवा करत जाना चाही। उमन विश्वविद्यालय म होवइया शोध ल सामयिक बनाए म घलोक जोर दीन। सुश्री उइके ह विश्वविद्यालय मन ल रोजगारोन्मुख होए के जरूरत बताईन। ये बेरा म संत श्री रावतपुरा सरकार, कुलपति श्री अंकुर अरूण कुलकर्णी संग कई ठन विश्वविद्यालय के कुलपति अऊ शिक्षकगण उपस्थित रहिन।