नवा श्रम संहिता मन ले मजूर मन ला मिलही आर्थिक अउ सामाजिक मजबूती – श्री योगेश दत्त मिश्रा

दंतेवाड़ा, राज्य सासन कोती ले मजूर मन के भला बर चलाय जात योजना मन के प्रति जागरूकता बढ़ाय के उदेस्य ले जिला मुख्यालय दंतेवाड़ा के छिंदनार ग्राम पंचायत म अतवार के दिन ‘मजूर जन संबाद सम्मेनल’ (श्रमिक जन संवाद सम्मेलन) के आयोजन करे गीस। ए कार्यक्रम म श्रम विभाग के अलग-अलग योजना के तहत 1242 हितग्राही मन ला डीबीटी (DBT) के माध्यम ले 1 करोड़ 4 लाख रूपया ले जादा के रासि सीधा ओमन के बैंक खाता म पठोय गीस।
कार्यक्रम के मुख्य अतिथि विधायक चैतराम अटामी ह कहिन के राज्य सासन कोती ले मजूर अउ ओखर परिवार के हित म 31 ले जादा योजना मन चलाय जात हे। ए सबो योजना के जानकारी हर एक मजदूर तक पहुँचना जरूरी हे, तभे ओमन एकर सही लाभ ले सकही। मजदूर जन संबाद सम्मेलन के उदेस्य घलो एही आय के जादा ले जादा मजदूर भाई-बहिनी मन योजना ले जुड़य अउ लाभ उठावंय।
कार्यक्रम के अध्यक्षता करत श्रम कल्याण मंडल के अध्यक्ष योगेश दत्त मिश्रा ह कहिन के केंद्र सरकार ह मजदूर मन के हित म चार नवा श्रम संहिता (Labor Codes) लागू करे के एतिहासिक फैसला लेहे हे, जेमन मजदूर अउ उंखर परिवार के आर्थिक अउ सामाजिक मजबूती के दिसा म बड़े कदम आय। उमन कहिन के देस के लगभग 45 प्रतिसत आबादी असंगठित छेत्र म काम करथे, जेकर विकास के बिना देस के पूरा विकास होना संभव नई हे।
ओमन चारों नवा श्रम संहिता — मजदूरी संहिता 2019, सामाजिक सुरक्षा संहिता 2020, व्यावसायिक सुरक्षा, स्वास्थ्य अउ कार्य परिस्थिति संहिता (OSH) 2020, अउ औद्योगिक संबंध संहिता 2020— के नियम मन के बारे म विस्तार ले जानकारी दीन। उमन बताइन के नवा नियम के तहत अब देस भर म एक ‘न्यूनतम वेतन’ (National Minimum Wage) तय करे जाही, जेकर ले कोनो राज्य तय वेतन ले कम पईसा नई दे सकहीं। संग म मजदूर अउ ओखर परिवार के सुरक्षा, ईलाज, पीएफ (भविष्य निधि) अउ दूसर सामाजिक सुरक्षा के सुबिधा मन ला अउ जादा मजबूत करे जाही।
ओमन उहां मौजूद जनप्रतिनिधि अउ मजदूर मन ले अपील करिन के ओमन जादा ले जादा मजूर मन ला विभाग के योजना के जानकारी देवय अउ ओमन ला लाभ ले बर उत्साहित करय, ताकि ‘विकसित छत्तीसगढ़’ अउ ‘विकसित भारत’ के सपना ला पूरा करे जा सकय।
ए कार्यक्रम म जनपद अध्यक्ष सुनीता भास्कर, जनपद अध्यक्ष शकुंतला भास्कर, जिला पंचायत सदस्य ममता मंडावी, जिला पंचायत सदस्य तुलेश्वरी नागेश, वरिष्ठ जनप्रतिनिधि संतोष गुप्ता समेत दूसर नेता मन, सरम विभाग के अधिकारी अउ करमचारी मन मौजूद रहिन।