रायपुर, 12 सितंबर 2024। मुख्यमंत्री श्री विष्णु देव साय छत्तीसगढ़ प्रदेश आर्चरी एसोसिएशन के नवा अध्यक्ष चुने गए हें। मुख्यमंत्री निवास म आज आयोजित एसोसिएशन के आम सभा के बैठक म सर्व सम्मति ले मुख्यमंत्री श्री साय ल अध्यक्ष चुने गीस।
मुख्यमंत्री ह ए अवसर म कहिन के आज व्यक्तिगत रूप ले मोर बर गौरव के बात हे, आप मन ह सर्वसम्मति ले मोला छत्तीसगढ़ प्रदेश आर्चरी एसोसिएशन के अध्यक्ष चुनेव। एखर बर आप मन के हृदय ले आभार। मुख्यमंत्री ह कहिन कि ए एसोसिएशन के बहुत अकन आयोजन मन म मोला सामिल होए के मौका मिलीस। राष्ट्रीय आर्चरी एसोसिएशन के अध्यक्ष श्री अर्जुन मुंडा जी के संग घलोक मोला आयोजन मन म सामिल होए के मौका मिलीस। उमन कहिन कि आर्चरी एसोसिएशन ह बड़ कुशलता अऊ परिश्रम ले छत्तीसगढ़ के तीरंदाज मन के प्रतिभा ल तरासिन जेखर से हमार खिलाड़ी मन ह राष्ट्रीय स्तर संग बहुत अकन प्रतियोगिता मन म शानदार प्रदर्शन करके पदक जीतिन।
मुख्यमंत्री श्री साय ह कहिन कि में खुद ए एसोसिएशन ले जुड़े हंव, सबो के सहयोग अऊ मार्गदर्शन म आर्चरी एसोसिएशन के काम मन ल अऊ बेहतर तरीका ले आगू बढ़ाबोन। उमन कहिन कि में खुद जनजातीय बहुल जशपुर क्षेत्र ले आथंव। बचपन म हमन घलोक तिर धनुष लेके शिकार करे जात रहेन। आर्चरी हम सबो के विशेष रूप ले जनजाति मन के पसंद के खेल हे। जशपुर जिला म विशेष पिछड़ी जनजाति पहाड़ी कोरवा निवास करथे। ये मनखे बड़ धनुर्धर होथे, प्राचीन काल म पहाड़ी कोरवा तिर धनुष ले शिकार करत रहिन। आज घलोक ऊंखर हर घर म तीन धनुष रहिथे। श्री साय ह कहिन कि ए मनखे मन के तीरंदाजी के नैसर्गिक प्रतिभा ल तराशे के प्रयास करे जाय। अभी प्रदेश म तीरंदाजी के तीन अकादमी हे। जशपुर जिला म घलोक आर्चरी अकादमी के विस्तार करबोन।
मुख्यमंत्री ह कहिन कि राज्य सरकार प्रदेश म खेल मन के विकास बर प्रतिबद्ध हे। खेल प्रतिभा मन ल तराशे बर सरकार कोति ले हर संभव प्रयास करे जाही। उमन कहिन कि राज्य सरकार ह ओलंपिक खेल म स्वर्ण पदक जीतइया छत्तीसगढ़ के खिलाड़ी ल तीन करोड़ रुपिया, रजत पदक जीतइया खिलाड़ी ल दू करोड़ रुपिया अउ कांस्य पदक जीतइया छत्तीसगढ़ के खिलाड़ी ल एक करोड़ रुपिया के पुरस्कार देहे के घोषणा करे गए हे। खेल मन के विकास बर जेन जरूरी होही करे जाही। हमार छत्तीसगढ़ के खिलाड़ी घलोक आर्चरी के क्षेत्र म प्रदेश के नाम रौशन करव।
ए अवसर म मुख्यमंत्री के सचिव श्री राहुल भगत, छत्तीसगढ़ बैडमिंटन एसोसिएशन के अध्यक्ष श्री विक्रम सिसोदिया संग छत्तीसगढ़ प्रदेश आर्चरी एसोसिएशन के नवनिर्वाचित पदाधिकारी उपाध्यक्ष श्री भारत मटियारा, श्री रामलखन पैकरा, श्री दीपेश अरोरा संग बहुत अकन पदाधिकारी, ऑब्जर्वर सर्वश्री अकरम खान, सुमंता चंद्र मोहंती, प्रवेश जोशी सदस्य गण, तीरंदाजी म पदक विजेता खिलाड़ी उपस्थित रहिन।