रायपुर, 29 अगस्त 2020। सिविल लाइन पुलिस ह एक अइसे आरोपी ल लखनऊ ले गिरफ्तार करे हे, जेन फर्जी नाम ले ऑनलाइन पर्सनल लोन लेके फरार हो जावत रहिस. आरोपी खुद ल पावर ग्रिड कॉर्पोरेशन इंडिया लिमिटेड के इंजीनियर बताके अलग-अलग नाम ले फर्जी पहिचान पत्र के जरिये लोन लेवत रहिस. येखर बर आरोपी फर्जी पे-स्लिप अउ फर्जी आधार कार्ड के उपयोग करत रहिस.
पुलिस के अनुसार अक्टूबर 2019 म आरोपी दीपक तिवारी उर्फ सिद्धार्थ तिवारी उर्फ अंकुर तिवारी के नाम ले बजाज फायनेंस कंपनी म ऑनलाइन आवेदन कर पावर ग्रिड कॉर्पोरेशन आफ इंडिया लिमिटेड के खुद ल इंजिनियर अउ वेतन 89 हजार 909 रुपिया मिलत हे बताके पे-स्लिप अउ फर्जी आधार कार्ड बनाके ऑनलाइन आवेदन करय. जेमा बजाज कंपनी ह 12 लाख 35 हजार 532 रुपिया कॉर्पोरेशन बैंक म आरोपी के खाता म पर्सनल लोन स्वीकृत करिस.
जेखर बाद ले आरोपी के खाता म 11 लाख 75 हजार 923 रूपया डाले गिस. बाद म वोहा पहली किश्त 23 हजार 407 रुपिया जमा घलो करिस. वोखर बाद पिछला 6 महीना तक किश्त ल नई पटाइस, फेर बजाज फायनेंस कंपनी ह आरोपी के पे-स्लिप अउ आने प्रस्तुत दस्तावेज के तस्दीक करिस, त वोहा फर्जी निकलिस.
बजाज फायनेंस कंपनी के शिकायत म आरोपी के खिलाफ धारा 420, 467, 468, 471 अपराध दर्ज करके पूरा मामला के जांच करत रहिन. इही दौरान टीम गठित करके आरोपी दीपक तिवारी उर्फ सिद्धार्थ तिवारी उर्फ अंकुर तिवारी ल लखनउ ले गिरफ्तार कर न्यायालय ले टाजिट रिमांड प्राप्त करके थाना लाने गिस.