न्योता भोज: काबर के अपन हाथ म अपनापन के जादू होथे…..

रायपुर, 11 मार्च, 2024। अपन जन्मदिन के अवसर म आयोजित न्योता भोज म मुख्यमंत्री श्री विष्णु देव साय के धर्मपत्नी श्रीमती कौशल्या साय ह अपन हाथ ले बने खीर अऊ केक लइका मन ल खवाईन अऊ ओ मन ल मया दीन। न्योता भोज के आयोजन सरदार प्रीतम सिंह सैनी प्राथमिक अउ पूर्व माध्यमिक शाला श्यामनगर म अऊ शासकीय बालिका गृह खम्हारडीह म करे गीस। उमन अपन परिवार अऊ लइका मन के संग न्योता भोज घलोक करिन।
ए मौका म श्रीमती साय ह लइका मन ले पूछिन के खीर कइसे बने हे। लइका मन ह बताइन के खीर अड़बड़ सुवाद वाले हे। उमन लइका मन ल बताइन के अपन जन्मदिन म हम हमेशा खीर बनाथन। मोर लइका मन ल घलोक खीर बहुत पसंद हे। तू मन सब बहुत मयारू लइका हव ते पाए के तू मन बर घलोक अपन जन्मदिन म आज खीर बनाके लाए हंव।
श्रीमती कौशल्या साय ह लइका मन ले पढ़ाई लिखाई अऊ लइका मन के छोट-छोट शरारत के बारे म बहुत अकन गोठ-बात करिन। उमन स्कूल के गुरूजी मन ले घलोक लइका मन के पढ़ाई लिखाई के बारे म चर्चा करिन।
श्रीमती कौशल्या साय ह चर्चा म बताइन कि ओ मन ल साय जी ह बताइस के हमार प्रधानमंत्री श्री नरेंद्र मोदी जी प्रधानमंत्री पोषण शक्ति निर्माण अभियान संचालित करत हे। ये बहुत सुंदर अभियान हे। एखर तहत प्रधानमंत्री जी ह सबले आग्रह करे हें कि अपन जन्मदिन अऊ जीवन के खास अवसर ल स्कूली लइका मन के संग मनाव। लइका मन ल भोजन कराव अऊ खुद लइका मन के संग भोजन करव।
जब साय जी ये बतावत रहिन, उही बेरा मैं ह ठान लेहे रहेंव के में अपन जन्मदिन स्कूली लइका मन के संग मनाहूं। जइसे में हर साल अपन लइका मन के जन्मदिन म खीर बनाथंव। वइसनहे ए पइत घलोक में अपन हाथ ले खीर बनाहूं अऊ स्कूली लइका मन ल खवाहूं। आज लइका मन ह बहुत मजा ले के खीर खाईन। ये मोर सौभाग्य हे कि ओ मन ल मोर हाथ के बनाय खीर पसंद आईस। आज मोर जन्मदिन सफल हो गे।