गरियाबंद, 6 अप्रैल 2021। जिला के फिंगेश्वर थाना इलाका म 5 महीना के गर्भवती महिला ह बीते रात घर म फांसी लगाके आत्महत्या कर लीस. बिहनिया जब पति ह देखिस त ओखर होश उड़गे. पति ह पत्नी के फंदा तुरंत नीचे उतारिस, लेकिन तब तक ओखर मउत हो चुके रहिस. पति ह घटना के जानकारी पुलिस ल दे दीस हे.
पुलिस मउका म पहुंच के कार्रवाई करत हे. मिले जानकारी के अनुसार 7 महीना पहली युवती अपन प्रेमी संग बिहाव रचाये रहिस. फिलहाल मउत के कारण के खुलासा नई हो पाये हे. पुलिस के पूछताछ म मृतिका के पति अशोक ह मामूली जानकारी दे हे. ओखर अनुसार वो दुनों के बीच कोनो बात ल लेके कभी कोनो विवाद नई होय हे. एखर ले पुलिस शक के बिनाह म जांच करत हे.
