धमतरी, 29 फरवरी 2024। निदान कार्यक्रम ले कई दिव्यांग मन ल फायदा होवत हे अऊ उंखर मुस्कान फेर लहुटत हे। धमतरी जिला म निदान कार्यक्रम के तहत शिविर लगाके दिव्यांगजन मन ल सहायक उपकरण, कैलीपर्स, श्रवण यंत्र, ट्रायसायकिल प्रदान करे गए हे। एखर से कई दिव्यांग मन ल फायदा मिले हे। मगरलोड विकासखंड के ग्राम भेण्ड्री निवासी श्री दिव्यांग देवलाल साहू ह बताइस कि सिविर म लगाए गए नकली पैर बहुतेच सुविधाजनक हे, एला पहिरे म कोनो दिक्कत नइ होवय। निदान ह ओ ल चले-फिरे म सक्षम बना देहे हे। वो ह दिव्यांगजन मन बर अइसन सार्थक निदान कार्यक्रम आयोजित करे बर प्रदेश के मुख्यमंत्री श्री विष्णुदेव साय, समाज कल्याण मंत्री श्रीमती लक्ष्मी राजवाड़े ल धन्यवाद देहे हे।
देवलाल ह बताइस कि चार साल पहिली ओ अपन रिश्तेदार के शादी म बारात गये रहिस, तब एक बस ह रिवर्स करत वोखर जउनी पांव म टक्कर मार दीस, जेखर सेती वोखर माड़ी के हाड़ा पूरा टूट गे, अऊ ओखर पांव ल काटना परिस। ओ पांव कटे के बाद अड़बड़ असहाय महसूस करे लागिस । छोटे-छोटे काम मन बर घलोक दूसर के भरोसे रहना परत रहिस। जीवन यापन म घलोक दिक्कत आवत रहिस। ते पाए के वो ह गांवे म छोट कन दुकान खोल लीस, जेखर से दैनिक जरूरत पूरा होए लगीस अऊ दुकानदारी उपर ध्यान लगाए लगिस। ओ ल एक पांव ले चले म दिक्कत होत रहिस, ते पाए के वो ह रायपुर म नकली पांव लगवाइस। ये पांव जादा सुविधाजनक नइ होए के सेती ओ ल चले म दिक्कत होत रहिस। तभे एक परिचित ह दिव्यांगज मन बर आयोजित निदान शिविर के जानकारी दीस। देवलाल निदान शिविर म पहुंचीस। शिविर म चिकित्सक मन ले जरूरी जांच कराके कुछेक घंटा म वोला जयपुर पैर लगा देहे गीस। जेखर से ओ ल चले म कोनो परेशानी नइ होवत हे।
दिव्यांग देवलाल के चेहरा म लहुटिस मुस्कान
