धान खरीदी केंद्र मन के बदलिस नजारा: घर बइठे टोकन, बेटी बनही अब अफसर!

रायपुर: ग्राम अछोटा के किसान निर्मला देवांगन खातिर ए साल के धान खरीदी बड़ राहत लेके आए हे। 60 कुंटल धान बेचे पहुंचे निर्मला ह बताइस के ए पइसा ले वोखर बेटी, जेन इंजीनियर बन गे हे, अब UPSC के तैयारी करही। वोखर बर ये धान बिक्री सिरिफ आमदनी भर नो हे, बल्कि बेटी के उज्ज्वल भविष्य के नवा भरोसा हे।
निर्मला ह बताइस के ए पइत खरीदी केंद्र मन म व्यवस्था पहिली ले बहुत बेहतर हे। सटीक तौल हे, भीड़ नइ हे अऊ स्टाफ घलोक सहयोगी हे। सबले बड़े सुविधा सरकार के ‘टोकन तुंहर दुवार’ ऐप ले मिले हे। अब किसान मन ल घर बइठे ही टोकन मिल जात हे, जेखर से उंखर समय अऊ मेहनत दुनों बचत हे। केंद्र मन म छांव अऊ पानी के घलोक पूरा इंतजाम हे। निर्मला जइसे हजारों महिला किसान मन खातिर ये आसान प्रक्रिया वरदान साबित होवत हे, जेन ऊंखर परिवार के सपना ल मजबूत करत हे।