कोरबा, 3 अक्टूबर 2020। छत्तीसगढ़ के दूरस्थ वनांचल म रहइया आदिवासी महिला ल अंतरराष्ट्रीय स्तर के पुरस्कार बर चुने गिस। निर्मला कुजूर गांधीवादी संगठन एकता परिषद ले जुड़े हे। ओमन ल डब्ल्यूडब्ल्यूएफएस नामक अंतरराष्ट्रीय पुरस्कार बर चयनित करे गे हे। निर्मला ह खुशी के इजहार करत हुए बतइस कि वो बीहड़ वनांचल म रहइया आदिवासी मन के बीच काम करत ओमन ल जागरूक करत हे। बीते कई साल ले जल, जंगल अउ जमीन बर काम करत संगठन एकता परिषद ले जुड़े निर्मला कुजूर संस्था के प्रमुख पी वी राजगोपाल ल अपन प्रेरणाश्रोत मानथे। निर्मला ह पसान क्षेत्र के पंडरी पानी गांव म रहइया धनुहार आदिवासी मन के बीच काम करिन। वो बताथे कि गांव म दू दर्जन धनुहार आदिवासी रथे जोन एक ढोड़ी के पानी पीयत रिहिस। इही ढोड़ी ले जानवर घलो पानी पीयत रिहिस। निर्मला ह येमन ल प्रेरित करिन, फेर सबो ह मिल के श्रमदान ले एक कुआं खोदिस। एखर अलावा निर्मला ह ग्रामीण मन ल वन अधिकार पट्टा दिलाये बर अब्बड़ प्रयास करिन हे।
ज्ञात रहे कि एकता परिषद ह विश्व शांति अउ न्याय बर पिछला वर्ष पी वी राजगोपाल के नेतृत्व म भारत ले जिनेवा तक के यात्रा शुरू करे रिहिस। उंखर दल म कोरबा जिला ले निर्मला कुजूर अउ मुरली दास संत घलो शामिल होय रिहिस। हालांकि कोरोना के विश्व भर म संक्रमण शुरू होय के चलत ये दल ल आर्मेनिया देश म यात्रा स्थगित करके वापस लहुटे ल पड़गे। निर्मला कथे कि ये यात्रा ले ओला कई देश के लोगन मन ले मिले के अउ काफी कुछ सीखे के मौका मिलिस। निर्मला ह बतइस कि ग्रामीण मन ल वन अधिकार अधिनियम के तहत काफी कम जमीन के पट्टा मिले हे, जबकि वो जादा म काबिज हे, अभी वो ओमन ल पूरा जमीन के हक दिलाये के मुहिम चलावत हे। 10 संघर्षशील महिला मन ल जेनेवा म डब्ल्यूडब्ल्यूएफएस नामक पुरस्कार देहे जावत हे। ओमा एकता परिषद ले जुड़े मध्यप्रदेश के शबनम शाह अउ सरस्वती उइके घलो शामिल हे।
