बचेली के बेटी निशा पाल के रक्तदान करे के फोटू सोसल मीडिया म होईस वाईरल

बचेली, 20.01.2021 बचेली के अपोलो हॉस्पिटल म एक हफ्ता ले भर्ती करका गांव के मासे नाव के आदिवासी युवती के शरीर फूल गए रहिस अऊ ओखर शरीर म सिरिफ दू ग्राम खून ही बांचे रहिस। मरीज संग कोई नइ रहिस त अपोलो के डॉ. मोहिद्दीन ह बैलाडीला रक्त ग्रुप के संचालक अऊ पार्षद फ़िरोज़ नवाब ल एकर सूचना दीस अऊ बी पॉजिटिव खून के सख्त जरूरत बताईस। नइ मिले म मरीज के जान के खतरा बताईस।
एखर जानकारी सोशल मीडिया के माध्यम ले रोहित कोस्टी ल मिलीस त वो ह ये बात के जानकारी सोसल मीडिया म बगराईस। ए बारे म बचेली पोस्ट आफिस म नौकरी करईया निशा पाल पता चलिस त वो खुद खून देहे बर तियार हो गे अऊ अस्‍पताल आके स्‍वयं रक्तदान करिस। बचेली के ये बेटी निशा पाल के खून देवत फोटू सोसल मीडिया म लउहे वायरल होगे एला देख के ओखर सहकर्मी रतन बघेल अऊ रितेश नेताम ह घलोक अपन खून दान करिस। एक दुसर ल मदद करे के मानवता के भाव ल सबो मन अडबड़ सहरावत हें अऊ ये फोटू ल सरलग लाईक कमेंट मिलत हे।