माउंट एवरेस्ट के 26200 फिट म फहराइस हे तिरंगा
मुख्यमंत्री श्री साय ह दीन बधाई अऊ शुभकामना
सुश्री निशु माउंट एवरेस्ट संग अब तक 22 पर्वत चोटी के करे हे फतह
रायपुर 16 जुलाई 2024। मुख्यमंत्री श्री विष्णु देव साय ले बिलासपुर जिला के पर्वतारोही सुश्री निशु सिंह ह सौजन्य मुलाकात करिस। देश- विदेश के कई प्रमुख पर्वत चोटी मन ल फतह कर डरे सुश्री निशु ह 21 मई 2024 के दुनिया के सबले ऊंचा चोटी माउंट एवरेस्ट के 26,200 फिट म तिरंगा फहराए हे। मुख्यमंत्री श्री साय ह वोला बधाई अऊ शुभकामना दीन अऊ कहिन के तोर ए शानदार उपलब्धि ह छत्तीसगढ़ ल घलोक गौरवान्वित करे हे। एकर से उभरत पर्वतारोही मन ल घलोक एक प्रेरणा मिलही।
सुश्री निशु ह बताइस के माउंट एवरेस्ट के चढ़ाई के समय ओ ल कई गंभीर चुनौती मन के सामना करना परिस। बार बार खराब होत मौसम, बर्फबारी, कम होत ऑक्सीजन लेवल अऊ ठंडा हवा मन ह वोखर कठिन परीक्षा लीस, फेर वोखर बुलंद हौसला ल डगमगवा नइ पाइस। आखिरकार वो ह अपन सपना ल सच कर देखाइस अऊ दृढ़ साहस अऊ इच्छाशक्ति के बदौलत माउंट एवरेस्ट के 26,200 फिट म तिरंगा फहरा दीस।
