घर-घर जाके सियान के रखे जात हे ख्याल
बीजापुर, 29 अगस्त 2020। जिला म सुरक्षित दादा-दादी, नाना-नानी अभियान के तहत् मनखे मन ल जागरुक करे जात हे। जेमां खासकर अइसन सियान मन ल जिंकर उमर 60 साल या ओखर ले जादा हे। कोरोना वायरस संक्रमण के खतरा सियान मन उपर जादा रहिथे। ए खातिर कोरोना वायरस ले संक्रमण अऊ उंखर बचाव बर सियान मन के विशेष देखभाल के जरूरत हे। ये अभियान ल नीति आयोग के दिशा-निर्देश के मुताबिक संचालित करे जात हे। बीजापुर जिला म कलेक्टर श्री रितेश कुमार अग्रवाल के मार्गदर्शन आन विभाग मन के आपसी समन्वय ले ये अभियान ल सुचारु रुप ले चलाए जात हे। जिला म ये अभियान के नोडल अधिकारी श्री गौरव पाण्डेय के बताती सुरक्षित दादा-दादी, नाना-नानी अभियान अंतर्गत सियान मन ल सरलग फोन के माध्यम ले संपर्क करके जानकारी लेहे जात हे। जेमां 3241 मनखे मन ल फोन करे गए हे जेमां 1814 सियान मन ले संपर्क होय हे, फोन करके ऊंखर स्वास्थ्य, पेंशन अऊ राशन जइसे सुविधा अऊ जरूरत के बारे मे जानकारी लेहे जात हे कुशलक्षेम पूछे जात हे।
अभी तक संपर्क के समय 207 मनखे मन ह अपन समस्या बताए हें, जेकर निराकरण करे जात हे। जेमां 42 मनखे मन ह स्वास्थ्य संबंधी समस्या बताए गए हे जऊन ल घर पहुंचके स्वास्थ्य अमला ह स्वास्थ्य जांच करके बेहतर ईलाज करके दवई अऊ जरूरी परामर्श देहे हें। जेमां स्वास्थ्य विभाग के टीम ह बीएमओ. डॉ. आदित्य साहू अऊ बीपीएम योगेश भगत के विशेष सहयोग रहे हे। उहें पेंशन के 133 प्रकरण आगू आए हे जेखर निराकरण करे गए हे, बाचे प्रकरण मन के निराकरण करे जात हे। राशन कार्ड ले संबंधित 6 प्रकरण मन के निराकरण विभाग ह करत हे। सुरक्षित दादा-दादी, नाना-नानी अभियान के तहत् भोपालपटनम ब्लॉक म सीईओ जनपद पंचायत श्री मनोज बंजारे ह खुदे बैंक सखी के संग जाके सियान मन ल घर पहुंच के पेंशन देवात हे। ये अभियान के तहत् सियान मन ल कुल 169 लाख 83 हजार 612 रूपिया पेंशन भुगतान करे जा चुके हे। 926 वृद्धजन हितग्राही मन ल अभियान ले जुड़े प्रशासन के टीम ह बताइस के ये विकट घड़ी म सियान मन के देखभाल करे अऊ उनला जागरुक करके उंखर स्वास्थ्यगत समस्या मन ल जाने अऊ निराकरण के बहुत जरूरत होथे। अइसन म ये काम ल करे म अपन आप म ही अच्छा महसूस होथे। खासकर तब जब सियान मन के समस्या मन के निराकरण होए म उनला खुशी होथे अऊ वो मन जाहिर करथे के प्रशासन ल उंखर चिंता हे। ए खातिर ये हालत म घलोक प्रशासन के अधिकारी-कर्मचारी ऊंखर सहयोग बर मदद करे घर तक आवत हें।