मुख्यमंत्री श्री भूपेश बघेल ह 20 हजार ले कम आबादी के शहर मन म मनरेगा लागू करे के दीन सुझाव
छत्तीसगढ़ के मुख्यमंत्री ह नीति आयोग के गवर्निंग काउंसिल के बैठक म लीन भाग
राज्यहित ले जुड़े कई ठन योजना अऊ विषय मन उपर अपन बात रखिन
रायपुर, प्रधानमंत्री के अध्यक्षता म नई दिल्ली म आयोजित नीति आयोग के गवर्निंग काउंसिल के सातवां बैठक म छत्तीसगढ़ के मुख्यमंत्री श्री भूपेश बघेल संघरिन। ये बेरा म मुख्यमंत्री ह बैठक ले संबन्धित एजेंडा बिन्दु के अकतहा राज्यहित ले जुड़े कई ठन योजना अऊ विषय मन उपर अपन बात रखिन। उहें, बैठक म प्रधानमंत्री ह छत्तीसगढ़ के गोधन न्याय योजना ल सोरियाईन। छत्तीसगढ़ के मुख्यमंत्री श्री भूपेश बघेल ह बताइन कि बैठक म प्रधानमंत्री ह विशेषकर गोधन न्याय योजना के बात करत कहिन कि, गोबर ले तियार होवत वर्मी कम्पोस्ट खेत मन के उत्पादकता बढ़ाय म सहायक हे अऊ ये किसान मन के हित म अच्छा योजना ये।
छत्तीसगढ़ के मुख्यमंत्री भूपेश बघेल ह कहिन कि पाछू साढ़े तीन बछर म नीति आयोग ह प्रदेश के आकांक्षी जिला मन के बेहतर प्रदर्शन के सराहना करे हे। फेर राज्य म संसाधन मन के समस्या अभी घलोक हे, जेकर समाधान होना चाही। उमन बताइन कि छत्तीसगढ़ अनाज उत्पादन के क्षेत्र म आत्मनिर्भर हे। फसल विविधीकरण ल बढ़ावा देहे बर राजीव गांधी किसान न्याय योजना, मुख्यमंत्री वृक्षारोपण प्रोत्साहन योजना लागू करे के संग ही छत्तीसगढ़ मिलेट मिशन गठित करे गए हे।
श्री बघेल ह सुझाव दीन कि फसल विविधीकरण अउ दलहल, तिलहन के उत्पादन अउ उत्पादकता बढ़ाए बर नवा विकसित फसल क़िस्म मन के नि:शुल्क बीज मिनी किट अउ ब्रीडर सीड बड़ पैमाना म कृषि अनुसंधान संस्थान मन के माध्यम ले उपलब्ध कराए जाना चाही।
