नियद नेल्लानार: नक्सल प्रभावित अचकट गांव म हर घर पहुंचिस पीए के शुद्ध पानी

सुकमा, नक्सलवाद ल खतम करके सुकमा जिला म आधारभूत सुविधा मन ल तेजी ले विकसित करे के नियद नेल्लानार योजना के असर अब अचकट गांव म घलोक दिखत हे। सुकमा के नक्सल प्रभावित ईलाका के अचकट गांव के हर घर म अब पीए के शुद्ध पानी खातिर नल लग गे हे। घर मन म लगे नल म पानी आय ले अब गांव वाला मन के पानी के जुन्ना समस्या के समाधान हो गए हे। अचकट गांव नक्सल प्रभावित कोंटा विकासखण्ड के ग्राम पंचायत कामाराम के आश्रित गांव हे।
जिला मुख्यालय ले लगभग 95 किलोमीटर दूरिहा बसे ए गांव के मनखे मन ल अब तक हैंडपंप अऊ कुवां के पानी दपर निर्भर रहना परत रहिस। गर्मी के मौसम म पानी के भारी किल्लत के सामना करना गांव वाले मन ल करना परत रहिस। ए समस्या के स्थायी समाधान निकालत जिला प्रशासन ह 2 सोलर टैंक अऊ 38 स्टैंड पोस्ट के स्थापना करके गांव म रहइया लगभग 120 गांव वाले मन ल स्वच्छ पेयजल उपलब्ध कराए हे। जल जीवन मिशन के अंतर्गत होए काम ले अचकट गांव के हर एक परिवार ल सीधा घर म ही पीए के शुद्ध पानी मिलत हे। गांव वाले मन ह घलोक ए योजना उपर प्रसन्नता जाहिर करे हे। ग्रामीण श्रीमती सुकमती सोड़ी ह कहिस के पहिली हमला दूरिहा ले पानी लाए ल परत रहिस, जेखर से कई पइत स्वास्थ्य संबंधी समस्या हो जात रहिस। अब घर म नल कनेक्शन लगे ले हमला स्वच्छ पानी मिलत हे। एखर बर हम मुख्यमंत्री श्री विष्णुदेव साय अऊ जिला प्रशासन के बहुत आभारी हन।
अइसनहे श्री सोड़ी मुकेश, श्री विजय सोड़ी अऊ श्री गणेश सोड़ी ह घलोक ए योजना ल सहरावत एला अपन जीवन स्तर म बड़का सुधार बताइन।