दंतेवाड़ा GG Digital News Desk, जेन गाँव मन मा कभु बिजली नइ रिहिस, उहाँ अब रात मा घलो दिन कस अंजोर रहिथे। अक्षय ऊर्जा विकास अभिकरण (क्रेडा) ह बस्तर के बीहड़ जंगल वाले गाँव मन के नक्शा बदल देहे हे। सरकार के ‘नियद नेल्ला नार’ (तुंहर अच्छा गाँव) योजना के तहत अब दूर-दराज के गाँव मा सोलर लाइट के चमत्कार दिखत हे।
13 गाँव मा सोलर के कमाल: क्रेडा विभाग ह दंतेवाड़ा जिला के 13 ठी खास गाँव ला पूरा सोलर ऊर्जा ले जोड़े के बीड़ा उठाए हे। मुलेर, बासनपुर, कामालूर, धुरली, गमावाड़ा अउ झिरका जइसे 6 गाँव मा ‘सोलर हाईमास्ट’ (ऊंच खम्भा वाला लाइट) लग चुके हे।
पहिली इहाँ साँझ होतेच अंधियारी छा जावत रिहिस, फेर अब गली, चौक अउ चौराहा रात भर जगमगावत रहिथे। एखर ले गाँव वाले मन सुरक्षित महसूस करत हें।
बटन दबातेच घर मा पानी: बिजली के संगे-संग अब पानी के समस्या घलो दूर हो गे हे। ‘जल जीवन मिशन’ के तहत ए गाँव मन मा 57 ठी ‘सोलर ड्यूल पंप’ लगाए गे हे। ए पंप ले 10 हजार लीटर के टंकी मा पानी भरथे अउ पाइपलाइन ले सिधा लोगन के घर तक पहुँचथे। अब माई-लोगन (महिला) मन ला दूरिहा पानी भरे जाय ला नइ परय।
गाँव वाले मन ए सुविधा बर सरकार अउ क्रेडा विभाग ला धन्यवाद देवत हें। ‘नियद नेल्ला नार’ योजना ले जंगल के भीतर बसे गाँव मा अब सही मायने मा विकास के सुरज उग गे हे।