तूता म अतिक्रमण के सिकायत मन ऊपर नियम के मुताबिक काम चालू, विस्थापन के कोनो प्रस्ताव नई हे : एनआरडीए

रायपुर, नवा रायपुर अटल नगर विकास प्राधिकरण के तहत अवइया गांव तूता म अतिक्रमण हटाए ला लेके सोशल मीडिया अउ दूसर माध्यम मन म चलत खबर मन के बीच नवा रायपुर अटल नगर विकास प्राधिकरण (एनआरडीए) हा बात साफ करत कहे हे के अभी ओती विस्थापन के कोनो कारवाही के प्रस्ताव नई हे।
उमन साफ करे हें के एनआरडीए ला मिले सिकायत मन के आधार म अभी सिरिफ नियम के मुताबिक ‘कारन बताओ नोटिस’ जारी करे गे हे।
प्राधिकरण के मुताबिक गाम तूता म अतिक्रमण के सिकायत सरलग मिलत रहिस। उही सिकायत मन के आधार म बने जांच करवाए गीस अउ ओकर बाद संबधित मन ला कारन बताओ सूचना पत्र जारी करे गीस।
एनआरडीए हा बताइस के 2 जुलाई 2026 के गांव के प्रतिनिधि मन अउ समाज के बड़े पदाधिकारी मन हा मुख्य कार्यपालन अधिकारी ले मिलके ए बिसय म गोठ-बात करिन। बैठक म ए बात ऊपर सहमति बनिस के गांव म सबो मनखे मन के बैठक बुलाके आम सहमति बनाए के उदीम करे जाही। ओकर बाद फेर से प्राधिकरण के अधिकारी मन ले गोठ-बात करके जनता के हित म समाधान निकाले जाही।
प्राधिकरण हा इहू बताइस के ग्राम पंचायत कोती ले घलो समे-समे म गांव के अलग-अलग जगा ले अतिक्रमण हटाए के संबंद में चिठ्ठी देहे जात रहे हे। इही प्रक्रिया के तहत संबधित लोगन मन ला पहिली कारन बताओ नोटिस जारी करे गे हे। प्राधिकरण के कहना हे के एकर उदेस काकरो संग अन्याव करना नई हे, भलुक कानून के मुताबिक सबो के भलाई बर काम करना हे। आगू के जम्मो फैसला नियम के मुताबिक अउ पूरा संवेदनशीलता के संग लेहे जाही, जिहां विकास के काम घलो झन रुकय अउ सबो के हित के घलो धियान रखे जा सकय।