- कोविड-19 के संक्रमण के रोकथाम अऊ बचाव के काम बर पइसा के चिन्ता झन करव
- स्वास्थ्य विभाग ल 60 करोड़ रूपिया के आबंटन जारी
- लॉकडाउन म राहत अऊ संक्रमण रोके के बने इंतजाम ले छत्तीसगढ़ के बनिस देश म नवा पहिचान
- देश म छत्तीसगढ़ मॉडल के चर्चा
- मुख्यमंत्री ह वीडियो कॉन्फ्रेंस ले जिला मन म चलत राहत काम अऊ संक्रमण रोके के उपाय मन के करिन समीक्षा
- अफवाह फैलइया मन उपर करे जाय कठोर कार्रवाई
- वनोपज खरीदे के इच्छुक व्यापारी मन ल देवव अनुमति
- श्रमिक मन ल रोजगार उपलब्ध कराए बर बड़का पैमाना म शुरू होही मनरेगा के काम
- गौठान मन ल जादा ले जादा काम मंजूर करत गौठान मन ल आजीविका केन्द्र के रूप म विकसित करे जाए
- हैण्ड पंप मन के मरम्मत बर चलाय जाय अभियान
- कटघोरा के हॉट स्पॉट म लॉकडाउन के मॉनिटरिंग म पुलिस पेट्रोलिंग, ड्रोन अऊ टेक्नॉलोजी के उपयोग
- अधिकारी-कर्मचारी सुरक्षा के संग करव सेवा के काम
रायपुर, 17 अप्रैल 2020। मुख्यमंत्री श्री भूपेश बघेल ह काली अपन निवास कार्यालय ले वीडियो कॉन्फ्रेंसिंग के माध्यम ले सबो जिला मन म लॉकडाउन के समय राहत अऊ कोविड-19 के संक्रमण रोके के उपाय मन के समीक्षा करिन। उमन कहिन के प्रदेश म कोनो लांघन झन सुतेय। सबो जरूरतमंद मनखे मन बर भोजन अऊ राशन सामान उपलब्ध कराए के बने सहिन व्यवस्था करे गए हे। जिंकर तीर राशनकार्ड नइ हे ओ मन ल घलोक राशन देहे जाही। वीडियो कॉन्फ्रेंसिंग म जानकारी देहे गीस के अधिकांश जिला मन म राशन कार्डधारी मन ल दू महिना के राशन के वितरण के काम पूरा होवत हे।