वैश्विक स्तर म होही भव्य वर्चुअल आयोजन
नाचा के यूट्यूब चैनल अऊ फेसबुक पेज म होही लाइव प्रसारण
रायपुर, सात समुंदर पार मनखे भले चले जाए फेर अपन माटी के महमहई ओ मन ल हमेशा बांधे रहिथे। छत्तीसगढ़ के इही खुशबू छत्तीसगढ़ एनआरआई समुदाय-नाचा (उत्तरी अमेरिका छत्तीसगढ़ एसोसिएशन) पूरा विश्व म बगरइया हे। छत्तीसगढ़ के 21वां स्थापना दिवस 01 नवंबर के बेरा म नाचा ह अमेरिका ले वैश्विक स्तर म एक भव्य वर्चुअल आयोजन करही। ये वर्चुअल आयोजन म छत्तीसगढ़ राज्य गठन के उद्देश्य मन ल बताय जाही संगेच इहां के संस्कृति, भाखा अऊ साहित्य ले देश-दुनिया ल परिचित कराए जाही। ए कार्यक्रम म छत्तीसगढ़िया समुदाय के सम्मान अऊ संस्कृति ल बढ़ावा देहे बर विशेष प्रस्तुति देहे जाही। ये कार्यक्रम नाचा के यूट्यूब चैनल (www.youtube.com/nachaglobal) अऊ फेसबुक पेज (www.facebook.com/cgnacha) के माध्यम ले एक नवम्बर के भारतीय समय अनुसार भिनसरहा 7 ले 9 बजे तक लाइव होही।
