उत्तर बस्तर कांकेर: मेरी कहानी मेरी जुबानी – आयुष्मान भारत योजना ले मासूम माहिरा ल मिलीस नवा जिंदगी

उत्तर बस्तर कांकेर, 10 जनवरी 2024। आयुष्मान भारत योजना आर्थिक रूप ले कमजोर अऊ जरूरतमंद परिवार बर वरदान साबित होवत हे। ये योजना के तहत कई गरीब परिवार के मुफ्त इलाज संभव होए हे। आयुष्मान भारत योजना के अइसनहेच एक लाभार्थी कांकेर विकासखण्ड के ग्राम पंचायत गढ़पिछवाड़ी निवासी श्रीमती सरिता मंडावी ह विकसित भारत संकल्प यात्रा म ’मेरी कहानी मेरी जुबानी’ म अपन अनुभव साझा करिस। वो ह बताइस कि वोखर परिवार म वोखर बेटी ल छोड़के सबो के आयुष्मान कार्ड बने रहिस। पउर साल वोखर 07 बछर के बेटी कु. माहिरा मंडावी के एक्सीडेंट हो गए रहिस अऊ ओखर मूड़ म गंभीर चोट आए रहिस। वो ह फेर अपन घायल बेटी के इलाज बर ओला जिला चिकित्सालय कांकेर म भर्ती कराइस। जिहां चिकित्सक मन कु. माहिरा के गंभीर हालत ल देखत मेकाहारा हॉस्पिटल रायपुर रिफर करिन। फेर उहां के चिकित्सक मन ह घलोक बेहतर इलाज बर डीके सुपर स्पेशलिटी हॉस्पिटल रिफर करिन। वोकर बताती वोकर बेटी के गंभीर स्थिति ल देखके ये चिंता होए लगिस कि इलाज बर पइसा कहां ले आही। फेर वोखर पति ह अस्पताले म तुरंते आयुष्मान कार्ड बनवाइस अऊ माहिरा के मुफ्त म सफल इलाज होइस। श्रीमती सरिता के बेटी अब एकदम स्वस्थ हे। श्रीमती मंडावी ह आयुष्मान भारत योजना के तहत मुफ्त इलाज बर केन्द्र सरकार के प्रति आभार प्रकट करिस।