- राज्य सरकार ह वनवासी मन के हित म लीस अहम् फैसला
- वन तुलसी, वन जीरा अऊ इमली के बीज संग बहेड़ा कचरिया, हर्रा कचरिया अऊ नीम बीज के होही खरीदी
- भूपेश सरकार ह डेढ़ साल म समर्थन मूल्य म खरीदी बर लघुवनोपज के संख्या 7 ले बढ़ाके करिस 31
रायपुर, 20 जून 2020। मुख्यमंत्री श्री भूपेश बघेल के मंशा के मुताबिक प्रदेश के वनवासी मन के हित ल ध्यान म रखत राज्य सरकार ह छत्तीसगढ़ म 25 ले बढ़ाके अब 31 लघु वनोपज मन के खरीदी समर्थन मूल्य म करे के अहम निर्णय लेहे हे। ए लघु वनोपज मन म वन तुलसी बीज, वन जीरा बीज, इमली बीज, बहेड़ा कचरिया, हर्रा कचरिया अऊ नीम बीज ल सामिल करे गए हे।
निरधारित समर्थन मूल्य के मुताबिक एमां वन तुलसी बीज 16 रूपिया, वन जीरा बीज 70 रूपिया, ईमली बीज 11 रूपिया, बहेड़ा कचरिया 20 रूपिया, हर्रा कचरिया 25 रूपिया अऊ नीम बीज 27 रूपिया प्रति किलोग्राम के दर म खरीदी करे जाही। हर्रा कचरिया बर भारत सरकार कोति ले निरधारित समर्थन मूल्य 23 रूपिया म राज्य सरकार कोति ले 2 रूपिया के बढ़ोतरी करके 25 रूपिया प्रति किलोग्राम निरधारित करे गए हे।
वन मंत्री श्री मोहम्मद अकबर ह बताइस के राज्य म एखर पहिली साल 2018 तक मात्र 7 लघु वनोपज के समर्थन मूल्य म खरीदी के व्यवस्था रहिस। अभी हाल सरकार कोति ले वनवासी मन ल लघु वनोपज के संग बड़ संख्या म रोजगार उपलब्ध कराए बर समर्थन मूल्य म लघु वनोपज मन के संख्या म सरलग बढ़ोतरी करत अब 31 लघु वनोपज कर देहे गए हे। एखर से वनांचल म रहइया मनखे मन ल जिहां बड़ संख्या म रोजगार मिलत हे, उहें उंखर आर्थिक स्थिति घलोक मजबूत होवत हे।
राज्य म एखर पहिली 25 लघु वनोपज साल बीज, हर्रा, ईमली बीज संग, चिरौंजी गुठली, महुआ बीज, कुसुमी लाख, रंगीनी लाख, काल मेघ, बहेड़ा, नागरमोथा, कुल्लू गोंद, पुवाड़, बेल गुदा, शहद अऊ फूल झाडू, महुआ फूल (सूखा), जामुन बीज (सूखा), कौंच बीज, धवई फूल (सूखा), करंज बीज, बायबडिंग अऊ आंवला (बीज सहित) अऊ फूल ईमली (बीज रहित), गिलोय अऊ भेलवा के खरीदी करे जात रहिस। राज्य सरकार ह कुसुमी लाख, रंगीनी लाख अऊ कुल्लू गोंद के खरीदी म समर्थन मूल्य के अलावा अकतहा प्रोत्साहन राशि घलोक देवत हे।