मुंगेली/लोरमी GG Digital News Desk, कहिथें कहूं मेहनत अउ सही योजना के संग मिल जाय, त मनखे के दिन बहुरत देर नइ लागय। मुंगेली जिला के लोरमी ब्लॉक, खुड़िया गाँव के किसान कुंवर सिंह संग अइसने होए हे। ‘मनरेगा’ (MGNREGA) योजना ले बने एक ठी डबरी (तलाब) ह ओखर गरीबी ला अमीरी मा बदल दीस।
पहिली रिहिस पानी के किल्लत
कुंवर सिंह पहिली पानी के कमी के सेती परेशान रहय। खेती सिरिफ अगास के भरोसा रिहिस अउ गरमी मा खेत सुखा जावत रिहिस, जेखर से परिवार चलाय मा बहुत तकलीफ होवत रिहिस। फेर जब मनरेगा के तहत ओखर जमीन मा डबरी बनिस, त ओखर तकदीर बदल गे।
अब होवत हे नोट के बरसा
डबरी बने के बाद कुंवर सिंह ला तीन तरफा फायदा होवत हे:
1. मछरी पालन ले कमई: डबरी मा मछरी पाल के वो हर साल 3.60 लाख रुपिया के सुद्ध आमदनी (प्रॉफिट) कमावत हे।
2. दुहरी फसल: अब पानी के सुविधा हे, त वो साल भर खेती करत हे अउ दू-दू ठन फसल लेवत हे।
3. सब्जी अउ चारा: डबरी के पार (मेड़) मा राहेर अउ साग-भाजी लगावत हे, जेखर ले घर बर खाय ला मिलत हे अउ जानवर बर हरा चारा घलो मिल जाथे।
बाकी किसान घलो ले सकत हें फायदा
जिला पंचायत के अधिकारी मन बताइन के कुंवर सिंह जइसे बाकी पात्र किसान घलो मनरेगा के तहत डबरी, पशु शेड, बकरी शेड, मुर्गी शेड या कुआँ बनवा सकत हें। एखर बर कलेक्टर के मार्गदर्शन मा काम चलत हे, ताकि गाँव के लोगन के आमदनी बाढ़ सकय अउ वोमन आत्मनिर्भर बन सकंय।
