कोरोना के एक अऊ मरीज आज स्वस्थ होके घर लहुटिस

छत्तीसगढ़ राज्य म अब सिरिफ एक कोराना संक्रमित मरीज

रायपुर, 6 अप्रैल 2020। छत्तीसगढ़ राज्य म कोरोना ले संक्रमित एक अऊ मरीज ल आज स्वस्थ होए के बाद डिस्चार्ज कर देहे गीस। राज्य बर राहत भरे बात ये हे के कोरोना ले संक्रमित पाए गे 10 मरीज मन म ले 9 मरीज ईलाज के बाद पूरा स्वस्थ हो गए हें। राज्य म अभी कोरोना के एक मात्र शेष संक्रमित मरीज के एम्स रायपुर म ईलाज चलत हे। ये मरीज के स्थिति म सुधार हे। जानबा हे के इतवार 5 अप्रैल के कोरोना ले संक्रमित चार मरीज के स्वस्थ होए के बाद ओ मन ल अस्पताल ले छुट्टी देहे गए रहिस।

मुख्यमंत्री श्री भूपेश बघेल ह राज्य के 10 कोरोना संक्रमित मरीज मन म ले 9 मरीज के पूरा स्वस्थ होए म प्रसन्नता जाहिर करे हें अऊ मरीज मन के उपचार म जुटे चिकित्सक मन के आभार जताए हें। मुख्यमंत्री श्री बघेल ह कहिन के छत्तीसगढ़ राज्य पूरा आत्मबल के संग लॉकडाउन अऊ सोशल डिस्टेंस के पालन करत कोरोना के खिलाफ लड़त हे। हमार चिकित्सक पूरा निष्ठा ले मरीज मन के सेवा म लगे हें। कोरोना हारही, हम जीतबोन।

छत्तीसगढ़ राज्य म आज 6 अप्रैल तक कोरोना वायरस के कुल 2303 संभावित मनखे के पहिचान करके सैंपल जांच करे गए रहिस, अभी तक 2281 के परिणाम नेगेटिव आए हे अऊ 12 के जांच जारी हे। एम्स रायपुर म ईलाज करवात कोरोना ले संक्रमित कोरबा के एक युवक ल आज स्वस्थ होए के बाद डिस्चार्ज कर दे गीस। छत्तीसगढ़ राज्य म अब कोरोना के संक्रमित एक मात्र मरीज हे, जेखर ईलाज रायपुर एम्स म जारी हे।