रायपुर, 6 अप्रैल 2020। राज्य म कोविड-19 के संक्रमण के रोकथाम बर अब यूएई अउ आन देश मन ले छत्तीसगढ़ अवइया मनखे मन के कोरोना जांच हर हाल म करे जाही। एखरे संगेच क्वॉरेंटाईन करे, मनखे मन के घलोक कोरोना जांच होही, जऊन बीते 28 दिन म अइसन राज्य मन ले छत्तीसगढ़ म आए हें, जिहां संक्रमण जादा रहे हे।
ये निर्णय आज इहां स्टेट कमांड एंड कंट्रोल सेंटर म स्वास्थ्य विभाग के सचिव श्रीमती निहारिका बारिक सिंह के अध्यक्षता म आयोजित विभागीय अधिकारी मन के बैठक म लेहे गीस। जानबा हे के यूके ले अवइया सबो मनखे मन के कोरोना टेस्ट राज्य म पूरा हो गए हे। स्वास्थ्य सचिव श्रीमती सिंह ह स्क्रीनिंग कोर कमेटी ल विदेश अउ आन राज्य मन ले अवइया मनखे मन के सैंपलिंग बर रोजेच के मान ले संख्या के निर्धारण करे के निर्देश देहे हें। उमन कहे हें के अइसन मनखे मन के सैंपल कलेक्शन बर संबंधित जिला के कलेक्टर अउ मुख्य चिकित्सा अउ स्वास्थ्य अधिकारी मन ल सूचित करे जाए। बैठक म राहत शिविर, क्वॉरेंटाईन सेंटर अउ होम क्वॉरेंटाईन म रखे गे मनखे मन के मॉनिटरिंग के संबंध म घलोक विस्तार ले चर्चा करे गीस।
सचिव श्रीमती सिंह ह कहिन के क्वॉरेंटाईन मनखे मन ले संपर्क करके ऊंखर स्वास्थ्य के रोजेच जानकारी लेवव, ताकि लक्षण या स्वास्थ्य म गड़बड़ी के स्थिति म लउहे इलाज करे जा सकय। सचिव श्रीमती सिंह ह डेली रिर्पोटिंग बर जिला, ब्लॉक अउ ग्राम स्तरीय सर्विलेंस टीम ल निर्देशित देहे ल ल कहे हें। बैठक म जानकारी देहे गीस के हेल्प लाईन नंबर 104 म 7 ले 8 हजार काल्स रोजेच आवत हे। क्वॉरेंटाइन मनखे मन के मॉनिटरिंग अउ मार्गदर्शन बर स्टेट हेल्प लाईन सेंटर के क्षमता बढ़ाए अउ इहां चिकित्सक अउ प्रशिक्षित स्वास्थ्य कर्मी मन के संख्या बढ़ाए के घलोक निर्देश देहे गीस। बैठक म कोरोना वायरस के संक्रमण के रोकथाम अउ संभावित मनखे मन के सैंपलिंग बर जिला मन ल व्हीटीएम किट अउ पीपीई किट संग आन सामान के आपूर्ति सुनिश्चित करे के घलोक निर्देश देहे गए हे। बैठक म स्वास्थ्य संचालक श्री नीरज बंसोड़, राष्ट्रीय स्वास्थ्य मिशन के संचालक डॉ. प्रियंका शुक्ला, सीजीएमएससी के प्रबंध संचालक श्री भुवनेश यादव संग आन वरिष्ठ अधिकारी उपस्थित रहिन।
