रायपुर, 19 अक्टूबर 2020। गढ़कलेवा ल नवा लुक देहे बर हस्तशिल्प विकास बोर्ड ह बांस शिल्प ऊपर आधारित फर्नीचर के नवा श्रृंखला लांच करिन हे। छत्तीसगढ़ के पारंपरिक परिवेश अऊ साज सज्जा ले जिला मन म प्रांरभ होवत ए केन्द्र मन म आकर्षण अऊ बढ़ जाही। नवा सरकार के गठन के बाद छत्तीसगढ़ के लोक कला अऊ संस्कृति ल जिहां बढ़ावा देहे जावत हे। उहें छत्तीसगढ़ के पारंपरिक व्यंजन मन ल लोकप्रिय बनाये बर राज्य के प्रत्येक जिला मुख्यालय म गढ़कलेवा खोले के पहल करे गे हे। छत्तीसगढी व्यंजन के लुत्फ न केवल युवा पीढ़ी बल्कि जुन्ना पीढ़ी के लोगन लेवत हे। ए दिन म दुनों ही पीढ़ी ल ए केन्द्र मन म देखे जा सकत हे। हस्तशिल्प विकास बोर्ड द्वारा ए केन्द्र मन ल आकर्षक अऊ छत्तीसगढ़ी परम्परा के अनुरूप बांस शिल्प फर्नीचर के नवा श्रृंखला जारी करे गे हे। ये फर्नीचर शुरूआत म केवल गढ़कलेवा बर तैयार करे जावत हे बाद म लोगन के मांग के अनुरूप एला बिक्री बर तैयार करे जाही।
बोर्ड के अधिकारी मन ह बतइस कि अब गढ़कलेवा म बांस शिल्प के ए आकर्षक फर्नीचर ऊपर बइठ के छत्तीसगढ़ी व्यंजन मन के लुत्फ उठा सकही। ये फर्नीचर न केवल आरामदेह हे बल्कि आकर्षक घलो हे। ओमन बतइस कि आंकाक्षी जिला नारायणपुर के बांस शिल्प सामान्य सुविधा केन्द्र म ए फर्नीचर मन ल तैयार करे जावत हे। बांस शिल्प के लोकप्रिय होए ले बांस के कारीगर मन ल नियमित रूप ले रोजगार मिलही। एखर अलावा ओमन ल अपन शिल्प ल निखारे अऊ आने आकर्षक सजावटी वस्तु बनाये बर प्रोत्साहन घलो मिलही। हस्तशिल्प बोर्ड द्वारा गढ़कलेवा के फर्नीचर मन के विशेष डिजाइन तैयार करे गे हे। ए फर्नीचर मन म आकर्षक पालिश करे गे हे। अधिकारी मन ह बतइस कि ए फर्नीचर मन ल तैयार करे बर स्थानीय बंसोड़ मन ल विशेष प्रशिक्षण देहे गे हे।
