बीजापुर के 15 गौठान मन म पशुधन संवर्धन के काम चालू: 927 पशु मन के करे गीस कृत्रिम गर्भाधान
रायपुर, मुख्यमंत्री श्री भूपेश बघेल ह आज बीजापुर जिला के ग्राम पंचायत मूसालूर के ग्राम नकुनपाल म बनाय गे गौठान के अवलोकन करिन। उमन उहां गांव वाले मन अऊ महिला स्व-सहायता समूह के महिला मन ले बड़ आत्मीयता ले बातचीत करिन अऊ ओ मन ल जैविक खेती अपनाए अऊ गोबर ले वर्मी कम्पोस्ट बनाए के समझाईश दीन। उमन गांव वाले मन ल रासायनिक उर्वरक के जगा गोबर खाद के खेत मन म उपयोग करे के सलाह देवत कहिन कि एखर ले अच्छा फसल होही अऊ कृषि उत्पाद के मूल्य घलोक अच्छा मिलही। गांव वाले मन ह मुख्यमंत्री ल कजरीफूल, जवांफूल चावल, तीखूर अऊ आन जैविक उत्पाद भेंट करिन। मुख्यमंत्री ह गौठान म नारियल अऊ आम के पौधा घलोक रोपिन।
मुख्यमंत्री ह चर्चा के समय कहिन कि पहिली पशु मन के गोबर मनखे ट्राली मन म बिक्कट कम दाम म ले जात रहिन, कहूं गोबर ले वर्मी कम्पोस्ट बनाय जाय त ये खाद 8 ले 10 रूपिया प्रति किलो के भाव ले बिकथे। गौठान म उपस्थित गांव वाले मन अऊ महिला मन ह मुख्यमंत्री ल बताइस कि ये गौठान म करीबन 200 पशु आथें। ये गौठान 3 एकड़ म निर्मित करे गए हे। महिला समूह ह गोबर ले 5-6 क्विंटल खाद घलोक बनाय हे। मुख्यमंत्री ह बीजापुर जिला के 15 गौठान मन म पशुधन संवर्धन के काम चालू होए के जानकारी मिले म प्रसन्नता प्रकट करिन। पशुधन विकास विभाग के अधिकारी मन ह मुख्यमंत्री ल बताइस कि गौठान मन म अब तक 927 पशु मन के कृत्रिम गर्भाधान करे गए हे।
मुख्यमंत्री ह गांव वाले मन ल पैरा नइ जलाए अऊ गौठान मन म पैरा दान करे के सलाह दीन। ये बेरा म राजस्व मंत्री अऊ बीजापुर जिला के प्रभारी मंत्री श्री जयसिंह अग्रवाल, उद्योग मंत्री श्री कवासी लखमा, सांसद श्री दीपक बैज, विधायकद्वय श्री मोहन मरकाम अऊ श्री विक्रम मंडावी घलोक उपस्थित रहिन।
