रायपुर, 7 अकटूबर 2020। छत्तीसगढ़ म कोरोना संक्रमित मरीज तेजी ले स्वस्थ होवत हे। राज्य शासन कोति ले संचालित कोविड अस्पताल, कोविड केयर सेंटर्स, निजी अस्पताल अऊ होम आइसोलेशन म इलाज के बाद स्वस्थ होवइया मरीज मन के संख्या एक लाख ले जादा हो गए हे। प्रदेश म अब तक एक लाख 551 मरीज कोरोना ल मात देहे हें। एमां कई ठन अस्पताल अऊ कोविड केयर सेंटर्स म ठीक होए 57 हजार 998 अऊ होम आइसोलेशन म उपचार के बाद स्वस्थ होए 42 हजार 553 मरीज सामिल हे। कोरोना के जंग जीतइया मरीज मन के संख्या तेजी ले बढ़े के सेती अब प्रदेश के रिकवरी दर 78 प्रतिशत हो गए हे। उहें मृत्यु दर 0.86 प्रतिशत हे। कोविड-19 ले होवइया मौत के राष्ट्रीय औसत 1.55 प्रतिशत अऊ रिकवरी दर 85 प्रतिशत हे।
प्रदेश म सबले जादा रायपुर जिला म 25 हजार 853 मरीज मन ह कोरोना ल मात देहे हें। दुर्ग म दस हजार 199, बिलासपुर म 7673, राजनांदगांव म 7152, रायगढ़ म 6213, जांजगीर-चांपा म 4328, बलौदाबाजार-भाटापारा म 3221, बस्तर म 2743, कोरबा म 2688, धमतरी म 2545, सरगुजा म 2240, महासमुंद म 2196, दंतेवाड़ा म 2150, बालोद म 2109 अऊ कबीरधाम म 2057 मरीज कोरोना ले स्वस्थ होए हें।
कांकेर जिला म 1823, बीजापुर म 1758, सुकमा म 1619, सूरजपुर म 1555, कोरिया म 1444, गरियाबंद म 1421, मुंगेली म 1376, बेमेतरा म 1368, कोंडागांव म 1231, नारायणपुर म 1226, जशपुर म 971, बलरामपुर-रामानुजगंज म 949 अऊ गोरेला-पेंड्रा-मरवाही म 302 मनखे मन ह कोरोना उपर विजय प्राप्त करे हें। प्रदेश म अभी हाल म सक्रिय मरीज मन के संख्या 27 हजार 238 हे।
