चौक-चौराहा मन म रंगोली, भिथिया म चित्रकारी अऊ नारा मन के संग लाए जात हे पोषण अऊ स्वच्छता संबंधी जागरूकता
रायपुर, 10 सितंबर 2020। पोषण संबंधी जागरूकता अऊ कुपोषित लइका मन के पहिचान के उद्देश्य ले पूरा देश म सितमबर महिना ल राष्ट्रीय पोषण महिना के रूप म मनाए जात हे। छत्तीसगढ़ म घलोक ये दौरान पोषण जागरूकता बर अड़बड़ उदीम करे जात हे।
महिला अऊ बाल विकास विभाग कोति ले पोषण, स्वास्थ्य, स्वच्छता संबंधी बहुत अकन गतिविधि संचालित करे जात हे। कोविड 19 ले बचाव बर शासन कोति ले देहे गए दिशा-निर्देश के पालन करत घर के अंगना, चौक-चौराहा मन म चित्रकारी, स्लोगन अऊ रंगोली के संग पोषण अऊ स्वच्छता संबंधी जानकारी मनखे मन ल देहे जात हे। संगेच पोषण के पांच सूत्र मन के जानकारी घलोक मनखे मन ल देहे जात हे। एखर अलावा पर्यवेक्षक, आंगनबाड़ी कार्यकर्ता अऊ सहायिका मन घर-घर जाके कुपोषित लइका मन संग गर्भवती अऊ शिशुवती महिला मन ल पोषण अऊ स्वच्छता बनाए रखे संबंधी समझाईश देहे जात हे। कार्यकर्ता मन बेरा-बेरा म लइका मन के वजन अऊ ऊंचाई लेके ऊंखर शारीरिक विकास के बारे म बतावत हें। संगेच घर के अंगना म फल, सब्जी के पौधा लगाके ’पोषण वाटिका’ विकसित करे म घलोक बल देहे जात हे।
समुदाय ल पौष्टिक आहार के बारे म जानकारी देहे के संग गर्भवती माता मन ल जादा मात्रा म मुनगा भाजी के उपयोग करे के सलाह देहे जात हे। किशोरी बलिका मन ल एनीमिया ले बचाव बर बताए जात हे के खानपान के कइसे विशेष ध्यान रखे जा सकत हे। गंभीर कुपोषित लइका मन के चिन्हांकन बर आंगनबाड़ी कार्यकर्ता मन घर-घर जाके अवलोकन करत हें अऊ गंभीर कुपोषित लइका मन ल तुरंते पोषण पुनर्वास केंद्र भेजे के समझाइश देहे जात हे। आंगनबाड़ी कार्यकर्ता सरलग माता मन ल स्तनपान, पोषण अऊ उपलब्ध सुविधा मन के जानकारी देवत हें।