रायपुर, महिला अऊ बाल विकास विभाग मंत्री श्रीमती अनिला भेंड़िया के अगुआई म ’सही पोषण देश रोशन’ अऊ ’गढ़बो सुपोषित छत्तीसगढ़’ के संदेश के संग आज भिनसरहा राजधानी रायपुर म तेलीबांधा तालाब (मरीन ड्राईव) ले विशाल साइकिल रैली निकाले गीस। पोषण महिना अंतर्गत आयोजित ये साइकिल रैली के आयोजन महिला बाल विकास कोति ले यूनिसेफ के सहयोग ले आयोजित करे गए रहिस।
पोषण जागरुकता बर आयोजित ये रैली म राज्य महिला आयोग के अध्यक्ष डॉ. किरणमयी नायक, विधायक धरसीवां श्रीमती अनिता योगेन्द्र शर्मा, यूनिसेफ राज्य प्रमुख श्री जॉब जकारिया संग बड़ संख्या म यूनिसेफ, एन.एस.एस., रायडर्स ग्रुप के सदस्य अऊ आंगनबाड़ी कार्यकर्ता सामिल होइन। साइकिल रैली करीबन 5-6 किलोमीटर के घेरा म गिंजर के फेर तेलीबांधा तालाब म खतम होइस। ये बेरा म श्रीमती भेंड़िया ह पोषण जागरुकता रथ ल हरियर झंडी देखाके रवाना करिस अऊ समाज ल कुपोषण मुक्त बनाए खातिर मनखे मन ल किरिया खवाईन।