सूरजपूर, 1 सितंबर 2021। महिला अऊ लइका मन के विकास अऊ ऊंखर स्वास्थ्य ल बेहतर रखे म स्वस्थ अऊ पोषक आहार के महत्वपूर्ण भूमिका होथे। सूरजपूर जिला म लइका मन ल सुपोषित बनाए बर आंगनबाड़ी केन्द्र मन म पोषण वाटिका (कोला बारी) बनाय गए हे, ताकि इहां अवईया लइका अऊ महिला मन ल भोजन के संग पोषक तत्व मन ले भरपूर हरियर साग घलो मिल सकय। आंगनबाड़ी केंद्र परिसरेच म मुनगा, लाल भाजी, पालक भाजी, संग आन पौष्टिक साग-सब्जी बों के ओ मन ल जेवन के संग परोसे जात हे। पोषक तत्व मन ले भरपूर आहार मिले ले आंगनबाड़ी केंद्र मन म अवइया लइका मन के सेहत म घलोक बदलाव नजर आए लगे हे।
जिला प्रशासन के हुकुम म महिला अऊ बाल विकास विभाग कोति ले जिला के आंगनबाड़ी केंद्र खड़गवांकलां बिचपारा, विकासखण्ड प्रतापपुर म आकर्षक पोषण वाटिका बनाए गए हे जिहां उत्पादित हरियर साग-भाजी ल लइका मन के भोजन म सामिल करके ऊंखर पोषण म बढ़ोतरी करे जात हे। केंद्र के सहायिका नीलम जायसवाल के बताती महिला अऊ बाल विकास विभाग के पर्यवेक्षक नीलमणि लकड़ा ह बीज वितरण करे रहिस जेन ल पोषण वाटिका म बों के बने देखरेख करे गीस। अभी हाल म बरबट्टी अऊ भिंडी (रमकेरिया) के सब्जी टुटत हे जेला लइका मन के जेवन संग दे के ओ मन ल सुपोषित करे के काम करे जात हे। अइसनहे कुपोषण ले होवइया नुकसान अऊ सुपोषण के प्रति जागरूक करे के संग आंगनबाड़ी कार्यकर्ता मन ह गृह भेंटकरके मनखे मन ल अपन घर म बारी तियार करे अऊ ओमां पौष्टिक साग-सब्जी लगाए बर प्रेरित करे जात हे। जेखर से लइका मन ल बेहतर आहार मिल सकय अऊ ओ मन कुपोषण के शिकार झन होवयं। ये पहल ले न सिरिफ लइका मन के पोषण स्तर म सकारात्मक बदलाव होवत हे, भलुक माता मन ल घलोक पौष्टिक आहार मिले लगे हे।
पोषण वाटिका (कोला बारी) ले सुधरिस लइका मन के सेहत
